Iste'foga chiqishini aytgan Qodirov yana saylovda qatnashishi mumkin
Checheniston rahbari Rossiya prezidenti taklifi va xalq qo‘llab-quvvatlashi bo‘lsa, saylovlarda ishtirok etishini bildirdi.
Checheniston rahbari Ramzan Qodirov Rossiya prezidenti tomonidan taklif bo‘lsa va mintaqa aholisi tomonidan qo‘llab-quvvatlansa, 2026-yilda bo‘lib o‘tadigan Checheniston prezidentlik saylovlarida ishtirok etishga tayyor ekanini bildirdi deydi gazeta.ru nashri.
Qayd etilishicha, bahor oylarida Qodirov iste’foga chiqish niyatini bildirgan va lavozimini tark etishga umid qilganini aytgan edi. Biroq siyosiy tahlilchilar uning yaqin orada lavozimni tark etish ehtimoliga shubha bilan qaragan.
Keyinchalik Ramzan Qodirov iste’foga chiqish masalasida yakuniy qaror qabul qilish vakolati faqat Rossiya prezidenti Vladimir Putinga tegishli ekanini ta’kidladi. U o‘zini buyruqlarni bajarayotgan “piyoda askar” sifatida ta’riflagan.
2022-yil sentabr oyida u lavozimda uzoq vaqt ishlaganini va “noma’lum hamda uzoq muddatli ta’tilga” loyiq ekanini bildirgan, shuningdek, bu borada tushunish va qo‘llab-quvvatlashga umid qilgan.
