Jizzaxda ayol eri bilan birga yashab, undan aliment talab qildi
Otaning aliment bo‘yicha 10 million so‘mdan oshiq qarzi bo‘lgan.
Jizzax viloyatining Forish tumanida ayol alimentdan qarzdor eri bilan birga yashayotganligi maʼlum bo‘ldi. Bu haqida MIB axborot xizmati Zamon.uz‘ga xabar berdi.
Qayd etilishicha, Majburiy ijro byurosining Forish tumani bo‘limi tomonidan farzandlar taʼminoti uchun aliment to‘lashdan qasddan bo‘yin tovlab, davlat ijrochisi huzuriga kelmasdan yurgan X.D.ga nisbatan qidiruv eʼlon qilingan.
Byuroning Jizzax viloyati boshqarmasi Qidiruv shuʼbasi xodimlari tomonidan o‘tkazilgan tezkor-qidiruv tadbirlarida X.D. Jizzax shahri, “Olmozor siti” hududida aliment undiruvchi bilan birga yashab kelayotgani aniqlangan.
Qidiruvda bo‘lgan shaxs topilib, keyingi ijro harakatlarini amalga oshirish uchun Byuroning Forish tumani bo‘limi davlat ijrochisiga topshirilgan.
Maʼlum bo‘lishicha, X.D.ning aliment bo‘yicha qarzi 10 million so‘mdan oshgan.
Undiruvchiga nega qarzdor bilan birga yashab turib, bu holatni yashirgani so‘ralganda, u qarzdorning qamalishini istamasligi, aliment mablag‘lari qamoqqa olmasdan undirib berilishini xohlaganini bildirgan.
Hozirda qarzdorga nisbatan qonunda belgilangan tartibda keyingi ijro harakatlari amalga oshirilmoqda.
