O‘zbekiston Jenevada ko‘chirilgan va fuqaroligi bo‘lmagan shaxslar huquqlarini himoya qilish tajribasini taqdim etmoqda

 

15–17-dekabr kunlari Jeneva shahrida 2025-yilgi Qochqinlar bo‘yicha global forum taraqqiyoti sharhiga bag‘ishlangan yuqori mansabdor shaxslarning ikkinchi uchrashuvi bo‘lib o‘tmoqda. Unda Inson huquqlari bo‘yicha O‘zbekiston Respublikasi Milliy markazi direktori Akmal Saidov boshchiligidagi O‘zbekiston delegatsiyasi ishtirok etmoqda. Tadbir BMT Qochqinlar ishlari bo‘yicha oliy komissari boshqarmasi tomonidan Shveytsariya Konfederatsiyasi bilan hamkorlikda tashkil etilgan.

Forum doirasida O‘zbekiston ko‘chirilgan va fuqaroligi bo‘lmagan shaxslar huquqlarini himoya qilish borasidagi milliy tajribasi va erishilgan natijalarni taqdim etmoqda. Xususan, xalqaro standartlarga mos ravishda huquqiy baza izchil mustahkamlanayotgani, yangi tahrirdagi Konstitutsiyada chet el fuqarolari va fuqaroligi bo‘lmagan shaxslarning huquq va erkinliklari kafolatlangani ta’kidlanmoqda. #IBelong global kampaniyasi doirasida 85 ming nafardan ortiq shaxs O‘zbekiston fuqaroligiga ega bo‘lib, mamlakat Markaziy Osiyoda fuqarosizlikni kamaytirish bo‘yicha eng barqaror natijalardan biriga erishdi.

Shuningdek, O‘zbekiston qo‘shni Afg‘onistondagi insonparvarlik inqirozi sharoitida BMT Qochqinlar ishlari bo‘yicha oliy komissari boshqarmasining Termizdagi mintaqaviy logistika markazi faoliyatini qo‘llab-quvvatlab, zarur yordamlarni tezkor yetkazishga hissa qo‘shgani qayd etildi. Forum davomida qochqinlar va ularni qabul qiluvchi davlatlarni qo‘llab-quvvatlashni kengaytirish, xalqaro hamkorlikni mustahkamlash va ilg‘or tajribalar almashish masalalari muhokama qilinadi.