Zelenskiy NATO aʼzoligidan voz kechish shartlarini eʼlon qildi
U nafaqat AQSH, balki Yevropa, Kanada, Yaponiya va boshqa davlatlardan xavfsizlik kafolatlarini talab qilmoqda.
Ukraina prezidenti Vladimir Zelenskiy AQSH va Yevropadan xavfsizlik kafolatlari evaziga NATOga aʼzolik talablaridan voz kechishga tayyorligini eʼlon qildi, deb xabar beradi The Financial Times.
Prezidentning taʼkidlashicha, bu masala NATOning 5-moddasiga o‘xshash kollektiv xavfsizlik kafolatlariga bog‘liq. Ukraina nafaqat Qo‘shma Shtatlardan, balki Yevropa hamkorlari, Kanada, Yaponiya va boshqa davlatlardan ham xavfsizlik kafolatlarini talab qilmoqda.
“Biz Ukraina va Qo‘shma Shtatlar o‘rtasidagi ikki tomonlama xavfsizlik kafolatlari, shuningdek, Yevropalik hamkorlarimiz va boshqa davlatlardan xavfsizlik kafolatlarini talab qilmoqdamiz. Har qanday tinchlik rejasi murosalar evaziga amalga oshiriladi”, – dedi Zelenskiy.
NATOning 5-moddasiga ko‘ra, blok aʼzosiga qilingan hujum butun ittifoqga qilingan hujum sifatida qaraladi. Zelenskiy taʼkidlaganidek, Ukraina hali ham Vashington va Yevropa yetakchilari bilan maslahatlashuvlardan so‘ng taqdim etilgan tinchlik rejasi bo‘yicha javobni kutmoqda.
Ukraina 2022 yilda NATOga tezkor aʼzolik uchun ariza topshirgan, biroq 2025 yil dekabr boshida NATO bosh kotibi Mark Rutte ittifoq aʼzolari o‘rtasida kelishuv yo‘qligini bildirgan. Shu bilan birga, Ukraina va AQSH delegatsiyalari muhokama qilayotgan tinchlik rejasida NATO Xartiyasining 5-moddasi asosida qo‘shimcha kafolatlar mavjud.
AQSH maʼmuriyati Ukraina uchun xavfsizlik kafolatlarini taqdim etishga tayyorligini bildirgan, shuningdek, Ukraina hududining 80 foizini saqlab qolish va qayta qurish ishlariga yordam ko‘rsatish ham nazarda tutilgan. Ushbu shartlar 15 dekabr kuni Berlinda AQSH prezidentining elchilari va Ukraina delegatsiyasi ishtirokida muhokama qilinadi.
Rossiya Ukraina NATOga aʼzolikdan voz kechishi tarafdori ekanligini bildirgan. Prezident Vladimir Putin har bir mamlakat o‘z mudofaa siyosatini belgilash huquqiga ega ekanligini taʼkidlagan, Tashqi ishlar vaziri Sergey Lavrov esa Moskva Kiyev bilan faqat ishonchli xavfsizlik kafolatlari asosida muzokaralar olib borishga tayyorligini bildirgan.
