Bekobodda mashinada odam urib o‘ldirib, jasadni kanalga tashlagan IIB xodimiga xotini yordamlashgan
Xodim avval jasadni mashinasiga yuklab, hodisa joyidan uzoqroq dala chetiga olib ketgan va turmush o‘rtog‘ini chaqirgan.
Avvalroq 11-dekabr kuni Bekobodda IIB xodimi mashinada 43 yoshli odamni urib o‘ldirgani va jasadni Sirdaryoga tashlagani haqida xabar berilgan edi.
Kun.uzning ma'lum qilishicha, hodisa Bekobod shahar IIB katta tezkor vakili D.N. tomonidan sodir etilgan bo‘lib, u mashinani mast holda boshqargan.
D.N. avval B.U.ni Nexia mashinasiga yuklab, hodisa joyidan uzoqroq dala chetiga olib ketgan va turmush o‘rtog‘i Z.N.ni chaqirgan. Z.N. Matiz mashinasida kelib, jasadni Nexia’dan Matiz’ga o‘tkazib, Bekobod shahar yo‘nalishi bo‘yicha harakatlanib, uni hodisa joyidan 35 km uzoqlikdagi Farhod kanaliga tashlagan.
B.U. o‘z vaqtida tibbiy yordam ko‘rsatilmaganligi sababli vafot etgan. Hozirda marhumning jasadi topilishi uchun tezkor qidiruv tadbirlari davom etmoqda.
D.N. 12-dekabr kuni qo‘lga olingan va sud qarori bilan unga qamoqqa olish ehtiyot chorasi qo‘llangan. D.N.ga nisbatan O‘zbekiston Respublikasi Jinoyat kodeksining 266-moddasi (transport vositalari harakati yoki ulardan foydalanish xavfsizligi qoidalarini buzish) 2-qismi va 117-moddasi (xavf ostida qoldirish) 2-qismi bo‘yicha jinoyat ishi qo‘zg‘atilgan.
Ma’lumotlarga ko'ra, Z.N.ni ishga aloqadorligi uning mashinasi tekshiruvdan o‘tkazilgach aniq bo‘lgan va hozirda holat yuzasidan ekspertiza tayinlangan.
Hozirda barcha tezkor qidiruv va tergov harakatlari davom etmoqda.
