O‘zbekistonning 6 ta viloyatida qor ko‘chishi mumkin
Ogohlantirish Qashqadaryo, Surxondaryo, Samarqand, Jizzax, Toshkent va Namangan viloyatlariga taalluqli.
O‘zgidromet xabariga ko‘ra, 17–22-dekabr kunlari kutilayotgan yog‘ingarchilik hamda havo haroratining o‘zgarishi sababli respublikaning tog‘li hududlarida qor ko‘chishi xavfi yuzaga kelishi mumkin.
Qor ko‘chishi xavfi quyidagi hududlarda prognoz qilinmoqda:
- Qashqadaryo viloyatida — Dehqonobod, Kitob, Qamashi va Shahrisabz tumanlarida;
- Surxondaryo viloyatida — Boysun, Qumqo‘rg‘on, Sariosiyo va Uzun tumanlarida;
- Samarqand viloyatida — Nurobod, Qo‘shrabot, Samarqand va Urgut tumanlarida;
- Jizzax viloyatida — Baxmal va Zomin tumanlarida;
- Toshkent viloyatida — Bo‘stonliq, Parkent va Ohangaron tumanlarida (Chatqol tizmasi tog‘lari);
- Namangan viloyatida — Pop tumanida.
O‘zgidromet tog‘li hududlarda istiqomat qiluvchi fuqarolarni, dam oluvchilarni hamda ushbu hududlarda harakatlanayotgan haydovchilarni ehtiyotkorlik choralariga qat’iy rioya qilishga chaqirdi.
