Putin ekstremizmga aloqador shaxslarning mablag‘larini cheklovchi qonunni imzoladi

 

Rossiya Federatsiyasi prezidenti Vladimir Putin ekstremistik faoliyat yoki terrorizmga aloqador shaxslarning moliyaviy operatsiyalarini qatʼiy nazorat qilishni nazarda tutuvchi yangi qonunni imzoladi. Ushbu hujjat bunday shaxslarning pul mablag‘lari va mol-mulkidan foydalanish tartibini sezilarli darajada cheklaydi. Bu haqda “RIA Novosti” xabar berdi.

 

Yangi qonunga muvofiq, ekstremist va terrorchilar ro‘yxatiga kiritilgan fuqarolarga faqat o‘z ehtiyojlari hamda ular bilan birga yashovchi, daromad manbayiga ega bo‘lmagan oila aʼzolarini taʼminlash maqsadida moliyaviy operatsiyalarni amalga oshirishga ruxsat beriladi. Bunday xarajatlarga ish haqi, pensiya, stipendiya, nafaqa va boshqa ijtimoiy to‘lovlarni olish hamda ulardan foydalanish kiradi.

 

Shu bilan birga, oila aʼzolari uchun sarflanishi mumkin bo‘lgan mablag‘lar miqdori cheklangan. Hukumat Rossiya Markaziy banki bilan kelishilgan holda, har bir oila aʼzosi uchun oyiga 10 ming rubldan oshmagan limit belgiladi.

 

Qonunga ko‘ra, bunday moliyaviy operatsiyalarni amalga oshirishdan avval fuqarolar Rosfinmonitoring bilan majburiy tartibda kelishuvdan o‘tishi lozim. Buning uchun rejalashtirilayotgan operatsiyalar, ular o‘tkaziladigan banklar va hisob raqamlari ko‘rsatilgan ariza taqdim etilishi talab etiladi.

 

Mablag‘lari muzlatilgan shaxslar gumanitar maqsadlarda beriladigan oylik nafaqalarni olish va sarflash bilan bir qatorda, soliq, jarima hamda boshqa majburiy to‘lovlarni amalga oshirish huquqiga ega bo‘ladi. Biroq bunday to‘lovlar faqat Terrorizm va ekstremizmni moliyalashtirishga qarshi kurash bo‘yicha idoralararo komissiyaga batafsil maʼlumotlarni o‘z ichiga olgan ariza topshirilgandan so‘ng ruxsat etiladi.

 

Agar bank hisob raqamlari orqali operatsiyalarni amalga oshirishning imkonsizligi asoslab berilsa, vakolatli organlar tomonidan shaxs foydalanishi mumkin bo‘lgan hisob raqamlari soni cheklanishi yoki umuman hisob raqamisiz amalga oshiriladigan operatsiyalar taqiqlanishi mumkin.

 

Qonunda, shuningdek, ekstremizm, qo‘poruvchilik yoki terrorizmga aloqadorlikda gumon qilinayotgan hamda qidiruvda bo‘lgan shaxslarning moliyaviy operatsiyalarini to‘liq to‘xtatib qo‘yish tartibi belgilandi. Rosfinmonitoring rasmiy veb-saytida shaxs ro‘yxatga kiritilganligi haqidagi maʼlumot eʼlon qilinganidan keyin 24 soat ichida uning mol-mulki muzlatilishi shart.

 

Bundan tashqari, BMT Xavfsizlik Kengashi rezolyutsiyalarida qayd etilgan shaxslarga nisbatan pul mablag‘lari va boshqa mulklarni muzlatish choralari oldindan xabardor qilinmasdan qo‘llanilishi belgilandi.

 

Mazkur qonun rasmiy eʼlon qilingan kundan boshlab kuchga kiradi.