Rossiyada “Gonkong grippi” tarqalmoqda
Shifokorlar epidemiyaning eng yuqori bosqichi hali oldinda ekanini aytishmoqda.
Ayni paytda Rossiya bo‘ylab har yuz kishidan biri gripp bilan kasallanayotgani qayd etilmoqda. Ayrim hududlarda esa bir hafta ichida bemorlar soni ikki baravarga oshgan. Mutaxassislar vaziyatni diqqat bilan kuzatib, epidemiologik holat keskinlashishi mumkinligini ta’kidlamoqda.
Shifokorlar joriy mavsumda asosiy shtamm sifatida Gonkong grippi — A (H3N2) ustun kelayotganini ma’lum qildi. Ushbu virus tez rivojlanishi va og‘ir asoratlarga olib kelishi bilan xavfli hisoblanadi. Ayniqsa, homilador ayollar, bolalar, keksalar hamda surunkali kasalligi bor shaxslar xavf guruhiga kiradi.
Gonkong grippi o‘tkir virusli kasallik bo‘lib, asosan nafas yo‘llarini zararlaydi. U yuqori harorat, kuchli intoksikatsiya, mushak va bosh og‘riqlari bilan kechadi. Ba’zi holatlarda ko‘ngil aynishi va hazm buzilishi ham kuzatiladi. Ushbu shtamm ilk bor 1968-yilda Gonkongda aniqlangan bo‘lib, hozirda mutatsiyaga uchragan holda mavsumiy gripp sifatida tarqalishda davom etmoqda.
