Shavkat Mirziyoyev rasmiy tashrif bilan Yaponiyada bo‘ladi
Prezident “Markaziy Osiyo – Yaponiya” birinchi sammitida ishtirok etadi.
O‘zbekiston Respublikasi Prezidenti Shavkat Mirziyoyev Yaponiya Bosh vaziri Sanae Takaichining taklifiga binoan 18–20-dekabr kunlari rasmiy tashrif bilan ushbu mamlakatda bo‘ladi. Tashrif doirasida davlat rahbari Tokio shahrida Yaponiya Imperatori Naruxito, Bosh vazir Sanae Takaichi, parlament va hukumat vakillari, shuningdek, siyosiy doiralar va yetakchi oliy ta’lim muassasalari rahbarlari bilan uchrashuvlar o‘tkazadi.
Muzokaralarda O‘zbekiston–Yaponiya strategik sheriklik munosabatlarini yanada kengaytirish, siyosiy, savdo-iqtisodiy, investitsiyaviy hamda ilmiy-ta’lim sohalaridagi hamkorlikni rivojlantirish masalalari muhokama qilinadi. Ishbilarmonlik dasturi doirasida Yaponiyaning yirik kompaniyalari va moliya institutlari rahbarlari bilan uchrashuvlar tashkil etilib, qo‘shma investitsiya loyihalarini ilgari surish rejalashtirilgan. Tashrif yakunida ikki tomonlama hujjatlar to‘plami qabul qilinishi kutilmoqda.
Shuningdek, Prezident Shavkat Mirziyoyev “Markaziy Osiyo – Yaponiya” formatidagi davlat rahbarlarining birinchi sammitida ishtirok etadi. Tadbirda “yashil iqtisodiyot”, barqaror rivojlanish, mintaqaviy hamkorlik va inson resurslarini rivojlantirish kabi ustuvor yo‘nalishlarda hamkorlik istiqbollari muhokama qilinadi. Sammit yakunida Tokio deklaratsiyasini qabul qilish rejalashtirilgan.
