Rossiya Moskvada 10 yoshli bolaning o‘ldirilishi bo‘yicha va nihoyat munosabat berdi
Avvalroq Rossiya elchisi avvalroq Tojikiston TIVga chaqirilgan edi.
Rossiya Xavfsizlik kengashi kotibi Sergey Shoygu Tojikiston Respublikasi Xavfsizlik kengashi kotibi Yusuf Rahmon bilan telefon orqali suhbat o‘tkazdi. Muloqot chog‘ida Moskva viloyatining Odintsovo shahar okrugiga qarashli Gorki-2 qishlog‘idagi ta’lim muassasasida pichoq bilan sodir etilgan hujum muhokama qilindi.
Rossiya Xavfsizlik kengashi rasmiy veb-saytida ma’lum qilinishicha, suhbat 17-dekabr, chorshanba kuni bo‘lib o‘tgan.
Suhbat davomida huquqni muhofaza qilish organlari tomonidan voqeaning barcha holatlarini xolis va to‘liq o‘rganish uchun zarur choralar ko‘rilayotgani qayd etildi.
Avvalroq, Rossiyaning Tojikistondagi elchisi Semyon Grigoryev Odintsovo maktabidagi fojia munosabati bilan Tojikiston Respublikasi Tashqi ishlar vazirligiga chaqirilgan edi. Unga boshlang‘ich sinf o‘quvchisining halok bo‘lishi bilan bog‘liq holda rasmiy nota topshirilib, hodisa bo‘yicha zudlik bilan va xolis tergov o‘tkazish hamda aybdorlarni qonun doirasida javobgarlikka tortish talabi bildirilgan.
Rossiya Tashqi ishlar vazirligi Tojikistonga va Moskva viloyatining Odintsovo shahridagi maktabda vafot etgan bolaning oilasiga hamdardlik bildiradi. Bu haqda vazirlik vakili Mariya Zaxarova ma'lum qildi.
“Rossiya Tashqi ishlar vazirligi tojik tomoniga, marhumlarning oilalariga va hujumda jarohat olganlarga chuqur hamdardlik bildiradi. Rossiya Tojikiston Respublikasi bilan strategik sheriklik va ittifoqchilik munosabatlarida mavjud boʻlgan oʻzaro qoʻllab-quvvatlash tamoyiliga amal qiladi”, deb taʼkidladi diplomat.
Mariya Zaxarovaning so'zlariga ko'ra, Tashqi ishlar vazirligi fojianing barcha holatlarini aniqlash va tergov o'tkazish uchun Moskvadagi Tojikiston elchixonasiga zudlik bilan yordam taklif qildi. U Rossiya tomoni tergovning xolisligini ta'minlash uchun barcha zarur choralarni ko'rishini ta'kidladi.
Ma’lumot uchun, 2025-yil 16-dekabr kuni Odintsovo shahar okrugidagi maktablardan birida pichoq bilan hujum sodir etilib, 15 yoshli o‘smir tomonidan bir nafar bola halok bo‘lgan.
