Toshkentda MIBdan qarzi bor mashinalarga qarshi kuchaytirilgan reyd o‘tkazilmoqda
Bir kunning o‘zida 184,2 mln so‘mlik qarz bo‘yicha 77 ta avtotransport vositasi aniqlangan.
Majburiy ijro byurosi Toshkent shahar boshqarmasi, Bosh prokuratura, Toshkent shahar prokuraturasi hamda poytaxt IIBB bilan hamkorlikda, qo‘shma qaror asosida poytaxt ko‘chalarida reyd tadbirlari o‘tkazmoqda. Mazkur reydlar davomida Byuro organlari ish yurituvidagi turli toifadagi qarzdorliklar bo‘yicha undiruv ishlari, shuningdek, jismoniy va yuridik shaxslarning banklardan olingan kredit qarzdorligi aniqlanib, amaldagi qonunchilik doirasida taʼsir choralari ko‘rilmoqda.
Qarzdor haydovchilardan to‘lovlarni undirish va ijro hujjatlarining ijrosini taʼminlash maqsadida qidiruvda bo‘lgan transport vositalari aniqlanib, vaqtincha jarima maydonlariga joylashtirilmoqda.
Jumladan, 10 dekabr kuni Byuroning Toshkent shahar boshqarmasi ish yurituvidagi ijro hujjatlari asosida 184,2 mln so‘mlik qarz bo‘yicha 77 ta avtotransport vositasi aniqlangan. Shundan 26 nafar qarzdor qarzini joyida qoplab, 66 mln so‘m undirilgan.
Shuningdek, 51 nafar qarzdor bank va boshqa to‘lovlarni joyida qoplamagani sababli, ularning avtotransport vositalari xatlanib, jarima maydoniga joylashtirilgan.
