Markaziy bank noyabr oyida to‘rtta bankni jarimaga tortdi

 

Markaziy bank huzuridagi Bank nazorati qo‘mitasi tomonidan 2025 yil noyabr oyida o‘tkazilgan yig‘ilishlarda jami 41 ta masala ko‘rib chiqilib, ular yuzasidan tegishli qarorlar qabul qilindi.

 

Qo‘mita yig‘ilishlarida ro‘yxatga olish va ruxsat berish yo‘nalishida 31 ta masala muhokama qilindi. Jumladan, kredit tashkilotlari ustaviga kiritilgan o‘zgartirishlarni ro‘yxatdan o‘tkazish bo‘yicha 5 ta, yangi tashkil etilayotgan mikromoliya va kredit tashkilotlarini hisob ro‘yxatidan o‘tkazish bo‘yicha 5 ta, mikromoliya tashkilotini reyestrdan chiqarish bo‘yicha 1 ta masala ko‘rib chiqildi.

 

Shuningdek, kredit tashkilotlari ustav fondidagi ulushga egalik qilish uchun ruxsat berish bo‘yicha 4 ta, banklarda auditorlik tekshiruvlarini o‘tkazish huquqi uchun auditorlik malaka sertifikatini berish bo‘yicha 4 ta hamda tijorat banklari kuzatuv kengashi va boshqaruvi aʼzolari, shuningdek muhim ahamiyatga ega xodimlarining nomzodlarini ko‘rib chiqish bo‘yicha 12 ta masala muhokama qilindi.

 

Prudensial normativlar talablariga rioya etilmagani, faoliyatni qonunchilik hujjatlariga muvofiq tashkil etmagani hamda inspeksiya tekshiruvlari davomida aniqlangan kamchiliklar sababli 1 ta mikromoliya tashkiloti va 1 ta to‘lov tashkilotiga nisbatan chora va sanksiyalar qo‘llanishi to‘g‘risida ogohlantirish berildi.

 

Shuningdek, Markaziy bank talablari hamda inspeksiya tekshiruvlari davomida, shuningdek jinoiy faoliyatdan olingan daromadlarni legallashtirish va terrorizmni moliyalashtirishga qarshi kurashish qoidalariga rioya qilinmaganligi sababli 4 ta bankka nisbatan jarima sanksiyalari qo‘llanildi.