AQSh Venesuela yaqinida uchinchi neft tankerini qo‘lga oldi
Oq uy hozircha ushbu holat yuzasidan rasmiy izoh berishdan bosh tortmoqda.
Reuters agentligining amerikalik ikki rasmiyga tayanib xabar berishicha, AQSh so‘nggi ikki hafta ichida Venesuela qirg‘oqlari yaqinida uchinchi kemani qo‘lga olgan. Rasmiylar aynan qaysi kema ushlangani haqida hozircha aniq ma’lumot bermagan.
Avvalroq, 20-dekabr kuni AQSh Venesueladan neft olib ketayotgan Centuries neft tankerini to‘xtatgan edi. Associated Press ma’lumotlariga ko‘ra, mazkur kema AQSh sanksiyalari ostida bo‘lmagan va qonuniy faoliyat yuritgan. Shuningdek, 10-dekabr kuni ham Venesuela neftini tashiyotgan Skipper tankerining ushlangani qayd etilgan.
17-dekabr kuni AQSh prezidenti Donald Tramp Truth Social ijtimoiy tarmog‘ida Venesuelaga borayotgan va u yerdan chiqayotgan sanksiya ostidagi neft tankerlariga nisbatan “to‘liq blokada” joriy etilganini e’lon qilgan. U bu qarorni Venesuela AQShdan “neft, yer va boshqa aktivlarni o‘g‘irlagani” bilan izohlagan. Shuningdek, noyabr oyida Venesuela havo hududi yopilgani ham ma’lum qilingan edi.
Bloomberg agentligi manbalariga ko‘ra, so‘nggi ushlangan uchinchi tanker Bella 1 bo‘lib, u Panama bayrog‘i ostida suzgan va AQSh sanksiyalari ro‘yxatiga kiritilgan. Kema neft ortish uchun Venesuelaga yo‘l olgan bo‘lgan. Oq uy hozircha ushbu holat yuzasidan rasmiy izoh berishdan bosh tortmoqda.
