“O‘zbek–yapon madaniy hamkorligi yangi bosqichga ko‘tarilmoqda” — Ozodbek Nazarbekov
Ikki mamlakat o‘rtasidagi madaniy aloqalar tinchlik, bag‘rikenglik va ma’naviy taraqqiyotga xizmat qiladi.
O‘zbekiston va Yaponiya o‘rtasidagi madaniy hamkorlik so‘nggi yillarda izchil rivojlanib, ikki xalqni yaqinlashtiruvchi muhim omilga aylanmoqda. O‘zbekona bag‘rikenglik, millatlararo totuvlik va insonparvarlik tamoyillari nafaqat mamlakat ichida, balki xalqaro maydonda ham yuqori baholanmoqda. Bu yondashuv Markaziy Osiyoda barqarorlik va o‘zaro ishonch muhitini mustahkamlashga xizmat qilmoqda.
Davlat rahbari tashabbuslari asosida O‘zbekistonning mintaqaviy va global hamkorlikdagi roli kuchayib bormoqda. Xususan, Markaziy Osiyo davlatlari rahbarlarining maslahat uchrashuvlari, shuningdek, “C5 + 1” formatidagi muloqotlar mamlakatning tinchlikparvar siyosatini xalqaro hamjamiyatga namoyon etdi. Bu jarayonlarda madaniy diplomatiya muhim o‘rin tutmoqda.
O‘zbekiston Respublikasi Prezidenti Shavkat Mirziyoyevning Yaponiyaga rasmiy tashrifi esa ikki tomonlama munosabatlarni sifat jihatidan yangi darajaga olib chiqdi. Tokio shahrida Yaponiya imperatori, hukumat rahbariyati, yetakchi universitetlar va yirik kompaniyalar vakillari bilan o‘tkazilgan uchrashuvlar strategik sheriklikni mustahkamlashga qaratildi. Tashrif doirasida madaniy hamkorlik masalalariga ham alohida e’tibor qaratildi.
Ikki davlat o‘rtasida madaniyat va san’at sohasidagi hamkorlik tobora kengaymoqda. Yapon san’atkorlarining O‘zbekistonda o‘tkaziladigan xalqaro festival va anjumanlarda muntazam ishtiroki, shuningdek, o‘zbek ijodkorlarining Yaponiyadagi nufuzli tadbirlarda qatnashishi bunga yaqqol misol bo‘la oladi. Mutaxassislar fikricha, bunday madaniy almashinuvlar xalqlar o‘rtasidagi do‘stlikni mustahkamlab, tinchlik va barqarorlikka xizmat qiladi.
