O‘zbekistonda yil boshidan buyon 7 milliondan ortiq pirotexnika buyumlari musodara qilindi
Aniqlangan holatlarning 10 tasi bo‘yicha jinoyat ishi qo‘zg‘atilgan, 80 ta holatda esa ma’muriy ish yuritilgan.
Bojxona organlari 2025 yil boshidan buyon o‘tkazilgan tezkor tadbirlar va nazorat jarayonlari davomida umumiy qiymati 2,3 mlrd so‘mdan ortiq bo‘lgan 7,25 million dona pirotexnika buyumlarini musodara qildi. Bu haqda Bojxona qo‘mitasi matbuot xizmati rahbari Husan Tangriyev ma’lum qildi.
Aniqlangan holatlarning 10 tasi bo‘yicha jinoyat ishi qo‘zg‘atilgan, 80 ta holatda esa ma’muriy ishlar yuritilgan. Noqonuniy muomaladan olingan barcha pirotexnika vositalari vaqtincha saqlash uchun hududiy Favqulodda vaziyatlar boshqarmalariga topshirilgan.
Bojxona qo‘mitasi va Favqulodda vaziyatlar vazirligi hamkorligida joriy yilda ham keng jamoatchilik ishtirokida musodara qilingan pirotexnika buyumlarini yo‘q qilish tadbirini o‘tkazish rejalashtirilgan. Fuqarolardan pirotexnika buyumlarining noqonuniy muomalasiga oid holatlarga duch kelganda, Bojxona qo‘mitasining 1108 qisqa raqamli ishonch telefoni orqali xabar berish so‘raldi.
Qayd etilishicha, xavflilikning II klassiga mansub pirotexnika buyumlarining ishlab chiqarilishi, olib kirilishi, sotilishi, saqlanishi va foydalanilishi qat’iyan taqiqlanadi. Qonunchilikka muvofiq, bunday qoidabuzarliklar uchun Ma’muriy javobgarlik to‘g‘risidagi kodeksga asosan BHMning 50 baravarigacha jarima belgilangan. Jinoyat kodeksiga ko‘ra esa aybdor shaxslar 10 yilgacha ozodlikdan mahrum etilishi mumkin.
