Xalqaro anjumanda tabiiy yechimlar va yashil texnologiyalar muhokama qilindi

 

19–20-dekabr kunlari Toshkent shahridagi Markaziy Osiyo atrof-muhit va iqlim o‘zgarishini o‘rganish universiteti — Green Universityda “Ekologik muammolarning tabiatga asoslangan yechimlari” mavzusida III xalqaro ilmiy-amaliy anjuman bo‘lib o‘tdi. Tadbir Atrof-muhit va tabiatni muhofaza qilish texnologiyalari ilmiy-tadqiqot instituti tashabbusi bilan tashkil etildi hamda davlat idoralari, jamoatchilik, xalqaro va nodavlat tashkilotlar, shuningdek, xorijiy ekspertlarni bir maydonga jamladi.

 

Anjumanni Ekologiya va iqlim o‘zgarishi milliy qo‘mitasi raisi Aziz Abduhakimov ochib berdi. U o‘z nutqida O‘zbekiston bugungi kunda iqlim o‘zgarishi, suv tanqisligi, bioxilma-xillikning qisqarishi va havo ifloslanishi kabi jiddiy ekologik muammolarga duch kelayotganini ta’kidladi. Shuningdek, 2025-yilning “Atrof-muhitni asrash va yashil iqtisodiyot yili” deb e’lon qilingani hamda “O‘zbekiston – 2030” strategiyasi doirasida ko‘kalamzorlashtirish, Orolbo‘yini tiklash, yashil energetikani kengaytirish kabi ustuvor vazifalar belgilanganiga alohida urg‘u berildi.

 

Anjumanning yalpi va sho‘ba majlislarida yashil iqtisodiyot, suv va yaylov ekotizimlarini barqaror boshqarish, iqlim xavflarini kamaytirish, suv tejovchi va ekologik innovatsion texnologiyalarni joriy etish masalalari muhokama qilindi. Xalqaro ekspertlar tabiatga asoslangan yechimlar bo‘yicha ilg‘or tajribalar bilan o‘rtoqlashdi. Ikki kunlik anjuman ekologik barqarorlikni oshirish, ilmiy hamkorlikni mustahkamlash va iqlim o‘zgarishiga moslashuv bo‘yicha amaliy takliflar ishlab chiqish uchun muhim maydon bo‘ldi.