Ukraina Xitoy fuqarolariga nisbatan sanksiyalar joriy etdi
Sanksiyalar Rossiya manfaatlarini targ‘ib qilgan shaxslarga nisbatan tatbiq etildi.
Ukraina prezidenti Vladimir Zelenskiy Rossiya harbiy-sanoat majmuasi bilan hamkorlik qilayotgan Xitoy fuqarolariga nisbatan sanksiyalar joriy etish to‘g‘risida qaror qabul qildi. Bu haqda Strana.ua nashri xabar berdi.
Ma’lumotlarga ko‘ra, cheklov choralari yil oxirigacha kuchga kiradi. Sanksiyalar Rossiyaning Ukrainadagi maxsus harbiy operatsiyasini qo‘llab-quvvatlayotgan, shuningdek, Rossiya ta’sirini ommaviy axborot vositalari orqali targ‘ib qilayotgan shaxslarga nisbatan qo‘llaniladi.
Bundan tashqari, o‘z kasbiy faoliyati yoki sportdagi obro‘sidan “Rossiya tajovuzini ulug‘lash” maqsadida foydalangan shaxslarga ham cheklovlar tatbiq etilishi qayd etilgan.
Eslatib o‘tamiz, noyabr oyining oxirlarida Vladimir Zelenskiy Rossiyaga qarshi navbatdagi sanksiyalar paketini e’lon qilgan edi. O‘shanda Ukraina Rossiya neft kompaniyalariga nisbatan AQSh bilan muvofiqlashtirilgan sanksiyalarni joriy etgani ma’lum qilingan.
Shuningdek, Ukraina hukumati Rossiya, Barbados, Tanzaniya, Panama va Kamerun bilan bog‘liq deb taxmin qilingan 56 ta kemaga qarshi ham sanksiyalar qo‘llagan. Ushbu 10 yillik cheklovlar litsenziyalarni bekor qilish, savdo shartnomalarini muzlatish, resurslar tranzitini to‘xtatish, Ukraina hududiy suvlariga kirishni taqiqlash hamda aktivlarni muzlatishni o‘z ichiga oladi.
