O‘zbekistonda atmosfera inversiyasi sabab havo sifati yomonlashishi mumkin
Inversiya tufayli ifloslantiruvchi moddalarning tarqalishi cheklanmoqda.
Yog‘ingarchiliklardan keyin respublika hududida havo haroratining nisbatan iliqlashishi bilan birga atmosferada inversiya jarayonlari yana kuchaymoqda. Bu haqda “O‘zgidromet” axborot berdi.
Ma’lum qilinishicha, atmosfera inversiyasi respublikaning bir qator hududlarida, jumladan Toshkent shahri, Samarqand va Jizzax viloyatlarida ayniqsa yaqqol namoyon bo‘lmoqda. Ushbu jarayon asosan ertalab, kechki va tungi soatlarda kuzatilib, atmosferaning pastki qatlamlarida havo almashinuvining cheklanishiga olib kelmoqda.
Natijada ifloslantiruvchi moddalar tarqalishi qiyinlashib, noqulay meteorologik sharoit shakllanmoqda. Xususan, mayda dispers zarrachalar — PM2,5 va PM10 — pastki atmosfera qatlamlarida to‘planib qolayotgani, ayrim hududlarda ularning konsentratsiyasi oshayotgani qayd etilmoqda. Bu holat havo sifati yomonlashishiga sabab bo‘lishi mumkin.
Mutaxassislarning ta’kidlashicha, O‘zbekistonning tabiiy-geografik joylashuvi, relyef xususiyatlari va sinoptik sharoitlari tufayli mamlakat hududida atmosfera inversiyasi tez-tez va deyarli muntazam ravishda kuzatiladi.
Dastlabki prognozlarga ko‘ra, respublika bo‘ylab iliq ob-havo hamda inversiya jarayonlari haftaning oxirigacha saqlanib turishi kutilmoqda.
