Rossiyadagi hibsxonada tug‘ilgan 1 yoshli o‘zbekistonlik qizcha vatanga qaytarildi
Bolaning onasi giyohvandlik vositalarining yirik miqdordagi noqonuniy aylanmasiga aloqadorlikda ayblanib, 9 yil qamalgan.
Rossiyaning Saxa Respublikasi (Yakutiya) hududidagi oilaviy tarbiyaga ko‘maklashish markazida yashab kelgan 1 yoshli O‘zbekiston fuqarosi bo‘lgan qizcha vatanga qaytarildi. Bu haqda “Dunyo” axborot agentligi xabar berdi.
Ma’lum qilinishicha, bolaning onasi Saxada mehnat faoliyati davomida giyohvandlik vositalarining yirik miqdordagi noqonuniy aylanmasiga aloqadorlikda ayblanib, 9 yil muddatga ozodlikdan mahrum etilgan. U jazoni o‘tash vaqtida farzandini dunyoga keltirgan, shundan so‘ng qizaloq davlatning oilaviy tarbiyaga ko‘maklashish markaziga joylashtirilgan.
Vaziyatdan xabar topgan bolaning buvisi nabirasini O‘zbekistonga olib ketish maqsadida Saxaga borgan va O‘zbekistonning Vladivostokdagi Bosh konsulxonasiga yordam so‘rab murojaat qilgan. Diplomatik vakolatxona tomonidan zarur hujjatlar rasmiylashtirilib, Rossiya tomoni bilan hamkorlikda bola qonuniy tartibda buvisiga topshirilgan.
Yakutiya hududidagi o‘zbek diasporasi faollari ko‘magida buvi va nabira uchun Yakutsk–Novosibirsk–Toshkent yo‘nalishi bo‘yicha aviachiptalar xarid qilinib, ular muvaffaqiyatli tarzda O‘zbekistonga qaytarildi. Avvalroq ham Rossiyaning boshqa hududlarida og‘ir vaziyatga tushib qolgan o‘zbekistonliklar va ularning farzandlari diplomatik vakolatxonalar yordami bilan vatanga olib kelingandi.
