Zelenskiy AQSh va Ukraina tinchlik rejasining 20 bandini amalga oshirishga tayyorligini bildirdi
Tomonlar hujjatlar ustida ishlashda davom etmoqda.
Ukraina Prezidenti Vladimir Zelenskiy AQSh va Ukraina o‘rtasida tinchlik hamda xavfsizlikni ta’minlashga qaratilgan hujjatlar ustida ishlar davom etayotganini ma’lum qildi. Bu haqda DW nashri Zelenskiy bayonotiga tayanib xabar berdi.
Uning so‘zlariga ko‘ra, tinchlik shartnomasi rejasining 20 bandi allaqachon ishlab chiqilgan va ularni amalga oshirishga Ukraina tomoni tayyor. Asosiy hujjat xavfsizlik kafolatlari bo‘yicha kelishuvdan iborat bo‘lib, unga maxfiy ilova ham kiritilgan. Ushbu ilovada kafil davlatlarning Ukraina Qurolli Kuchlarini qo‘llab-quvvatlash bo‘yicha majburiyatlari batafsil belgilangan.
Shuningdek, Zelenskiy urushdan keyingi davrda Ukrainani tiklashga qaratilgan kelishuv ustida ham tomonlar faol ish olib borayotganini ta’kidladi.
Ukraina Prezidenti AQSh va Yevropadan kutilayotgan ayrim xavfsizlik kafolatlariga ham to‘xtalib o‘tdi. Xususan, Ukraina Qurolli Kuchlari sonini 800 ming nafargacha yetkazishga qaratilgan moddiy yordam, Yevropa Ittifoqiga a’zolik istiqbollari, havo, dengiz va quruqlikdagi xavfsizlikni ta’minlash, shuningdek, “xohlovchilar koalitsiyasi” doirasida energiya, moliyaviy va boshpana bilan ta’minlash masalalari shular jumlasidandir.
Ma’lum qilinishicha, Vashington tomonidan taqdim etiladigan xavfsizlik kafolatlari Yevropa kafolatlaridan alohida hujjat sifatida rasmiylashtiriladi. Ushbu kafolatlar yuridik kuchga ega bo‘lishi uchun AQSh Kongressi tomonidan tasdiqlanishi lozim.
