“Buni aybi kambag'alligimi” — advokat sud qaroriga e'tiroz bildirdi
Qashqadaryo viloyat sudining apellyatsiya instansiyasidagi holat yuzasidan rasmiy bayonot berildi.
Ijtimoiy tarmoqlarda Qashqadaryo viloyat sudining apellyatsiya instansiyasi majlisida sud jarayoni yakuniga yetgach, ishda himoyachi sifatida qatnashgan advokat tomonidan sudyaga nisbatan qo‘pol muomala va haqorat aks etgan videolavhalar tarqaldi.
Tergov maʼlumotlariga ko‘ra, advokat L. Sharipov sud zalida fuqarolar oldida shovqin ko‘tarib, mobil telefonining kamerasi orqali sudyaga provokatsiya qilgan va sudyaga nisbatan bosim o‘tkazishga uringan. Mazkur holat sud tartibiga zid hisoblanadi.
Sud tomonidan advokatning harakatlariga nisbatan huquqiy baho berish maqsadida Qashqadaryo viloyat prokuraturasi va Advokatlar palatasi Qashqadaryo viloyat hududiy boshqarmasiga tegishli hujjatlar yuborildi.
Eʼtibor qaratish lozimki, sud qaroridan norozi tomonlar qonunda belgilangan tartibda yuqori instansiyaga shikoyat qilish huquqiga ega. Sudyaga nisbatan haqoratli so‘zlar ishlatish, qo‘pol munosabatda bo‘lish yoki shu yo‘l bilan bosim o‘tkazish urinishlari qonunga xilofdir va tegishli tartibda huquqiy baholanishi shart.
Sud jarayonida qatnashuvchi barcha shaxslar, jumladan advokatlar ham, sud odobi qoidalariga, qonun talablariga va sud hokimiyati obro‘sini hurmat qilishga qatʼiy rioya qilishi lozim.
