Chiqindilarni boshqarish va sirkulyar iqtisodiyot bo‘yicha yangi imtiyozlar joriy etildi
“O‘zbekiston – 2030” strategiyasiga muvofiq chiqindilardan muqobil energiya olishni 35 foizga oshirish va poligonlarni 50 foizga qisqartirish vazifalari belgilandi.
2025-yil 24-dekabr kuni Ekologiya va iqlim o‘zgarishi milliy qo‘mitasida O‘zbekiston Respublikasi Prezidenti ekologiya masalalari bo‘yicha maslahatchisi Aziz Abduhakimov boshchiligida sanitar tozalash korxonalari rahbarlari bilan uchrashuv bo‘lib o‘tdi.
Uchrashuvda Chiqindilarni boshqarish va sirkulyar iqtisodiyotni rivojlantirish agentligi direktori Sharifbek Hasanov soha holati bo‘yicha maʼlumot taqdim etdi. Tahlil natijalariga ko‘ra, 111 ta korxona faoliyati ko‘rib chiqildi, jumladan 15 ta davlat, 50 ta DXSH, 5 ta klaster va 41 ta muqobil korxona. “O‘zbekiston – 2030” strategiyasiga muvofiq chiqindilardan muqobil energiya olishni 35 foizga oshirish va poligonlarni 50 foizga qisqartirish vazifalari belgilandi.
Aholining roziligini oshirish maqsadida chiqindilarni olib ketish grafiklariga rioya qilish, Sall-markazlar va onlayn platformalar ishini kuchaytirish hamda “mahalla yettiligi” orqali muammoli hududlarni bartaraf etish bo‘yicha topshiriqlar berildi. Soha uchun 12 ta yangi imtiyoz joriy etildi va 12 ta mavjud preferensiya muddati uzaytirildi.
Shuningdek, 47 ta poligon rekultivatsiya qilinib yopildi, 37 tasi esa elektron tarozi va kuzatuv kameralari bilan jihozlandi. Muhim yangilik — 2026 yil 1 yanvardan boshlab to‘lovlar faqat ko‘rsatilgan xizmat hajmiga qarab onlayn undiriladi va mablag‘lar Agentlik hisob raqami orqali KPI asosida taqsimlanadi.
Uchrashuvda tarif siyosatini qayta ko‘rib chiqish, bozorlar va umumovqatlanish obyektlari uchun alohida tariflar joriy etish, imtiyozlarni 2031 yilgacha uzaytirish hamda yoqilg‘i taʼminoti uchun “yashil yo‘lak” tashkil etish masalalari muhokama qilindi. Shuningdek, qarzdorlikni undirish tizimi elektr energiyasiga integratsiya qilinib, to‘lovlar to‘liq onlayn amalga oshiriladi va yuridik shaxslar bilan ommaviy oferta shartnomalari tuziladi.
Chiqindilarni boshqarish agentligi direktori Sharifbek Hasanov boshchiligidagi ishchi guruh 2026 yil aprelga qadar Qoraqalpog‘iston Respublikasi, Qashqadaryo va Samarqand viloyatlaridagi sanitar tozalash korxonalari faoliyatini tahlil qilib, yangi hududlarni birlashtirish va xonadonma-xonadon targ‘ibot ishlarini tashkil etishga masʼul etib belgilandi.
