Rossiya viloyatlarining birida migrantlarga maktab va bog‘chalarda ishlash taqiqlanadi
Cheklovlar 2026-yildan boshlab kuchga kiradi.
Rossiyaning Tyumen viloyatida migrantlarning taʼlim muassasalarida faoliyat yuritishiga cheklov joriy etiladi. Tegishli qaror viloyat gubernatori Aleksandr Mur tomonidan imzolandi deb xabar berdi TASS.
Rasmiy maʼlumotlarga ko‘ra, mazkur cheklovlar 2026 yildan boshlab kuchga kiradi. Unga muvofiq, migrantlarga bolalar bog‘chalari, maktabgacha taʼlim muassasalari, umumtaʼlim maktablari, shuningdek, boshlang‘ich, umumiy va o‘rta taʼlim tashkilotlarida ishlash taqiqlanadi.
Bundan tashqari, ish beruvchilarga migrantlarni bir qator boshqa sohalarga jalb etish ham cheklanadi. Xususan, bolalar ovqatlari va boshqa oziq-ovqat mahsulotlarini ishlab chiqarish, ixtisoslashtirilgan do‘konlarda tamaki mahsulotlarining chakana savdosi, shahar va shahar atrofi yo‘lovchi tashish xizmatlari, taksi haydovchisi sifatida ishlash hamda yuk tashish bilan bog‘liq transport xizmatlarida migrantlar mehnatidan foydalanish taqiqlanadi.
Mazkur qaror hududda mehnat bozorini tartibga solish, ijtimoiy sohalarda xavfsizlik va nazoratni kuchaytirishga qaratilgani taʼkidlanmoqda.
