Xorazmda Tezkor vakilning o'zi tezkor tadbirda 30 ming dollar bilan qo‘lga tushdi
Shuningdek, Farg‘onada 3 gektar yerni 115 million so‘mga noqonuniy sotmoqchi bo‘lgan shaxslar ushlandi.
Xorazm viloyatida olib borilgan tezkor tadbirlar davomida Xiva shahri hududida joylashgan, qishloq xo‘jaligi mahsulotlari ekish uchun ajratilgan 12 sotix yer maydonida uy-joy qurish uchun ruxsat olib berishni va’da qilgan mansabdor shaxs ushlandi.
Aniqlanishicha, Xorazm viloyati Ichki ishlar boshqarmasi Tezkor-qidiruv xizmati katta tezkor vakili ushbu masalada hokimiyat idoralarida ishlovchi mansabdor tanishlari orqali ruxsat olib berish evaziga fuqarodan 30 ming AQSh dollari talab qilgan.
Mazkur shaxs Davlat xavfsizlik xizmati, Iqtisodiy jinoyatlarga qarshi kurashish departamenti hamda Ichki ishlar vazirligining Shaxsiy xavfsizlik bosh boshqarmasi xodimlari tomonidan ashyoviy dalillar bilan qo‘lga olindi.
Hozirda unga nisbatan Jinoyat kodeksining 168-moddasi 4-qismi “a” bandi hamda 28, 211-moddasi 3-qismi “a” bandi bilan jinoyat ishi qo‘zg‘atilib, “qamoq” ehtiyot chorasi qo‘llanilgan.
Shuningdek, Farg‘ona viloyatida ham shunga o‘xshash holat qayd etildi. Buvayda tumanida yashovchi, 1998-yilda tug‘ilgan shaxs 2006-yilda tug‘ilgan tanishi bilan oldindan til biriktirib, o‘zlari va yana 14 nafar yoshga dehqonchilik faoliyati uchun davlat tomonidan imtiyozli shartlar asosida ajratilgan jami 3 gektar yer maydonini boshqa shaxs nomiga rasmiylashtirib berishni va’da qilgan.
Ular ushbu noqonuniy xizmat evaziga 115 million so‘m talab qilib, 9 500 AQSh dollari hamda 700 ming so‘mni olayotgan vaqtida Davlat xavfsizlik xizmati va Ichki ishlar organlari xodimlari tomonidan ushlandi. Natijada ularning noqonuniy harakatlariga barham berildi.
Mazkur shaxslarga nisbatan Jinoyat kodeksining 25, 168-moddasi 2-qismi “a”, “b” bandlari hamda 229-6-moddasi 2-qismi “b” bandi bilan jinoyat ishi qo‘zg‘atilib, hozirda tergov harakatlari olib borilmoqda.
