Yangi yil munosabati bilan Toshkentda ayrim ko‘chalarda harakat vaqtincha cheklanadi
Harakat cheklovlari 2026-yil 10-yanvarga qadar amal qiladi.
Yangi yil bayrami tadbirlarini o‘tkazish hamda fuqarolar xavfsizligini taʼminlash maqsadida Toshkent shahrining Sergeli va Bektemir tumanlaridagi ayrim ko‘chalarda avtotransport vositalari harakati vaqtincha cheklanadi.
Maʼlum qilinishicha, Sergeli tumanida 2025 yil 25 dekabrdan boshlab 24/7 rejimda faoliyat yurituvchi gastronomik turizm ko‘chasida Yangi yil tadbirlari o‘tkazilishi munosabati bilan bir qator yo‘l uchastkalari yopiladi.
Xususan, quyidagi hududlarda transport harakati vaqtincha to‘xtatiladi:
— So‘g‘diyona ko‘chasi — Yangi Sergeli ko‘chasi kesishmasidan Jaloyir va Bag‘rikeng ko‘chalari kesishmasigacha bo‘lgan qismi;
— Jaloyir ko‘chasi — So‘g‘diyona ko‘chasi kesishmasidan Obihayot ko‘chasi kesishmasigacha bo‘lgan qismi.
Shuningdek, Bektemir tumanida 2025 yil 25 dekabrdan boshlab Chirchiqbo‘yi ko‘chasining ayrim qismida “Coca-Cola Garden” bog‘ida o‘tkaziladigan bayram tadbirlari sababli avtomobillar harakati vaqtincha cheklanadi.
Haydovchilarga mazkur yo‘nalishlarda muqobil yo‘llardan foydalanish hamda harakatni oldindan rejalashtirish tavsiya etiladi.
Harakat cheklovlari 2026 yil 10 yanvarga qadar amal qiladi.
