Namanganda “Ko‘mir ta’minot” MCHJ mansabdori qamoqqa olindi
U lavozim tayinlash va omborga keluvchi ko‘mir ortilgan yuk vagonlari sonini ko‘paytirib berish evaziga 40 ming pora talab qilgan.
Namangan viloyatida “Ko‘mir ta’minot” mas’uliyati cheklangan jamiyati mansabdor shaxsiga nisbatan jinoiy ish qo‘zg‘atildi. Bu haqda DXX Zamon.uzga xabar berdi.
Aniqlanishicha, “Ko‘mir ta’minot” MChJ Namangan viloyat filiali boshlig‘ining o‘rinbosari o‘zining yuqori lavozimlarda ishlovchi tanishlari orqali fuqaroni viloyatdagi tumanlardan birining ko‘mir ombori rahbari lavozimiga tayinlab berish hamda omborga keladigan ko‘mir ortilgan yuk vagonlari sonini ko‘paytirib berish evaziga 40 ming AQSh dollari talab qilgan.
Joriy yilning 6-dekabr kuni mansabdor shaxs so‘ralgan pul mablag‘idan 25 ming AQSh dollarini filial xodimi orqali olib, fuqaroni ko‘mir ombori mudiri lavozimiga tayinlanishini ta’minlagan.
Keyinchalik esa qolgan 15 ming AQSh dollari, shuningdek, omborga ko‘mir ortilgan 30 ta vagon yuborilgani uchun ulush sifatida 7 500 AQSh dollari, jami 22 500 AQSh dollarini talab qilgan.
Ushbu pul mablag‘lari o‘zining vositachisi bo‘lgan filial xodimi orqali olinayotgan vaqtda Davlat xavfsizlik xizmati hamda Iqtisodiy jinoyatlarga qarshi kurashish departamenti xodimlari tomonidan ularning noqonuniy harakatlariga chek qo‘yildi.
Mazkur holat yuzasidan gumonlanuvchi shaxslarga nisbatan O‘zbekiston Respublikasi Jinoyat kodeksining 168-moddasi 4-qismi “a” bandi hamda 211-moddasi 3-qismi “a” bandi bilan jinoiy ish qo‘zg‘atildi va ularga nisbatan “qamoq” ehtiyot chorasi qo‘llanildi.
Shuningdek, ko‘rilgan choralar natijasida aholiga ko‘mir mahsulotlarini o‘z vaqtida hamda imtiyozli narxlarda yetkazib berish choralari yo‘lga qo‘yildi.
