Poytaxtda pulli avtoturargohlar uchun yillik ruxsatnomalar joriy etiladi
Rezidentlar uchun tungi soatlarda bepul to‘xtash imkoniyati yaratiladi.
Toshkent shahrida pulli to‘xtab turish joylaridan foydalanish tartibi o‘zgaradi. Yangi qarorga ko‘ra, poytaxtda rezidentlar uchun maxsus yillik avtoturargoh ruxsatnomalari joriy qilinadi. Har bir turar joy manzili bo‘yicha ko‘pi bilan ikki dona rezident ruxsatnomasini ro‘yxatdan o‘tkazish mumkin bo‘ladi.
Qarorga asosan, rezidentlar uchun soat 20:00 dan 08:00 gacha avtoturargohlarda to‘xtash bepul etib belgilandi. Kunduzgi vaqtda esa amaldagi tariflar asosida to‘lov undiriladi. Ruxsatnoma bir yil muddatga beriladi va undan foydalanish faqat belgilangan hududlarda amal qiladi.
Yillik rezidentlik ruxsatnomasi uchun bir bazaviy hisoblash miqdori — hozirda 412 ming so‘m — to‘lanadi. Mazkur tartib 2026-yil 1-fevraldan boshlab kuchga kiradi.
