Qirg‘izistonda elektron sigaretalar importiga vaqtinchalik taqiq joriy etildi
Qaror rasman e’lon qilinganidan 15 kun o‘tib kuchga kiradi.
Qirg‘iziston Respublikasi Vazirlar Mahkamasi aholi salomatligini muhofaza qilishga qaratilgan navbatdagi qarorni qabul qildi. Hukumat qaroriga muvofiq, elektron sigaretalar hamda ular uchun mo‘ljallangan kartrijlarni mamlakat hududiga olib kirish vaqtincha taqiqlanadi. Bu haqda kaktus.media nashri xabar berdi.
Ma’lum qilinishicha, mazkur cheklov elektron sigaretalar importiga olti oy muddatga joriy etilgan. Qaror rasman e’lon qilingan kundan boshlab 15 kun o‘tib kuchga kiradi.
Vaqtinchalik taqiqdan ko‘zlangan asosiy maqsad — nikotinga qaramlik darajasini kamaytirish, ayniqsa, yoshlar o‘rtasida elektron sigaretalarning keng tarqalishining oldini olishdir. Rasmiylarning ta’kidlashicha, so‘nggi yillarda mazkur mahsulotlar yoshlar orasida tez ommalashib, aholi salomatligi uchun jiddiy xavf tug‘dirmoqda.
Shu munosabat bilan elektron sigaretalarning nazoratsiz importini cheklash orqali jamoat salomatligini muhofaza qilish choralari kuchaytirilmoqda.
