Samarqandda mashinasiga “01 777 PPX” raqamini taqib harakatlangan shaxs jazolandi
Fuqaro “Lacetti” avtomobiliga qo‘lbola usulda yasalgan avtoraqamni taqib, Urgut tumanida yarim soat harakatlangan. U bu ishni suratga tushish uchun qilgan.
Samarqand viloyati Urgut tumanida “Lacetti” avtomobiliga qo‘lbola usulda tayyorlangan “01 777 PPX” davlat raqamini taqib harakatlangan shaxs maʼmuriy javobgarlikka tortildi. Sud qaroriga ko‘ra, u yarim soat davomida ushbu qalbaki avtoraqam bilan harakatlangan.
Aniqlanishicha, H.S. 2025 yil 4 sentyabr kuni avtomashina yuvish shoxobchasiga borish maqsadida qalbaki raqamni o‘rnatgan. YHXB xodimlari tekshiruvi davomida uning aslida “30 X 877 OB” davlat raqami egasi ekani maʼlum bo‘lgan. Fuqaro bunday ishni faqat rasmga tushish uchun qilganini bildirgan.
Sud H.S.ni JKning 227-1-moddasi 1-qismi bilan aybli deb topib, BHMning 50 baravari — 20 million 600 ming so‘m jarima tayinladi. Shuningdek, 1 juft qalbaki avtoraqam yo‘q qilinishi belgilandi. Qayd etilishicha, 2025 yil 25 dekabr holatiga ko‘ra, “01 777 PPX” raqami hech kimga rasmiylashtirilmagan.
