Toshkentda “metan zapravkalar”dagi navbatlar sabab shahar avtobuslari qatnovi kamaydi

 

So‘nggi kunlarda ijtimoiy tarmoqlarda ayrim yo‘nalishlarda harakatlanayotgan jamoat transporti avtobuslarining gaz yoqilg‘i quyish shoxobchalarida navbatda qolayotgani haqida xabarlar va videomateriallar tarqaldi.

 

Mazkur holat yuzasidan “Toshshahartransxizmat” aksiyadorlik jamiyati Axborot xizmati quyidagilarni ma’lum qiladi.

 

Bugungi kunga qadar Toshkent shahrida kuniga 1 mingdan ortiq katta va o‘ta katta sig‘imli avtobuslar siqilgan tabiiy gaz (metan) yoqilg‘isida harakatlanib kelmoqda. Ushbu avtobuslarni yoqilg‘i bilan ta’minlash 33 ta avtomobillarga gaz to‘ldirish kompressor shoxobchalari (AGTKSh) orqali amalga oshirib kelingan.

 

Havo haroratining keskin pasayishi sababli poytaxt aholisini, ijtimoiy muassasalar va strategik ahamiyatga ega obyektlarni tabiiy gaz bilan uzluksiz va barqaror ta’minlash maqsadida avtobuslarga xizmat ko‘rsatuvchi AGTKShlar soni vaqtincha 11 tagacha qisqartirildi.

 

Shu munosabat bilan “Hududgaz poytaxt” filiali hamda Toshkent shahar hokimligi bilan kelishilgan holda, faoliyat yuritayotgan AGTKShlar ro‘yxati tasdiqlandi. “Toshshahartransxizmat” AJ rahbariyati tomonidan ushbu ro‘yxat asosida avtobuslarni yoqilg‘i quyish shoxobchalariga yetkazish jadvali ishlab chiqildi.

 

AGTKShlargacha bo‘lgan masofaning uzayishi, qish mavsumida gaz iste’molining ortishi hamda magistral gaz quvurlaridagi bosimning pasayishi natijasida avtobuslarga yoqilg‘i quyish vaqti sezilarli darajada oshib, shoxobchalarda navbatlar yuzaga kelmoqda.

 

Mazkur vaziyatni qisqa muddatda barqarorlashtirish, yo‘nalishlardagi avtobuslar harakati va qatnov oralig‘ini saqlab qolish, shuningdek yo‘lovchilarga ko‘rsatilayotgan transport xizmatlarining uzluksizligini ta’minlash maqsadida “Toshshahartransxizmat” AJ rahbariyati va mas’ul bo‘linmalar tomonidan tungi navbatchilik tashkil etilgan.

 

Hozirda vaziyat doimiy nazoratga olingan.