AQSHda “eng xavfli jinoyatchilar” ro‘yxatiga to‘qqiz nafar o‘zbekistonlik kiritildi
Ro‘yxatdagi shaxslarning aksariyati Lotin Amerikasi mamlakatlari fuqarolari hisoblanadi.
AQSH Ichki xavfsizlik departamenti (Department of Homeland Security — DHS) tomonidan yuritiladigan onlayn maʼlumotlar bazasiga “eng yomon jinoyatchilarning eng yomoni” toifasida to‘qqiz nafar O‘zbekiston Respublikasi fuqarosi kiritildi.
Mazkur maʼlumotlar bazasi DHS tarkibiga kiruvchi Immigratsiya va bojxona nazorati xizmati Immigration and Customs Enforcement — ICE) tomonidan yuritiladi hamda AQSH hududida turli jinoyatlar sodir etganlikda ayblanib, hibsga olingan eng xavfli xorijiy fuqarolar haqidagi maʼlumotlarni o‘z ichiga oladi. Ushbu tizim noqonuniy muhojirlarni aniqlash va deportatsiya qilish jarayonlarida qo‘llaniladi.
Qayd etilishicha, ro‘yxatga kiritilgan to‘qqiz nafar O‘zbekiston fuqarosi tajovuz, jinsiy tajovuz, o‘g‘irlik, giyohvand moddalar savdosi, jumladan kokain savdosi, zo‘rlash hamda boshqa og‘ir jinoyatlarda ayblanmoqda.
Maʼlumotlar bazasidagi shaxslarning aksariyati Lotin Amerikasi davlatlari fuqarolari bo‘lib, ushbu mintaqa AQSHga noqonuniy migratsiya oqimi yuqori bo‘lgan hududlar qatoriga kiradi. Jumladan, ro‘yxatda minglab Meksika fuqarolari ham mavjud.
