O‘zbekiston tarixida bu yil yalpi ichki mahsulot 145 mlrd AQSH dollaridan oshdi

 

Prezident Shavkat Mirziyoyev Oliy Majlis va O‘zbekiston xalqiga yo‘llagan Murojaatnomasida ijtimoiy infratuzilma va iqtisodiy rivojlanish borasida erishilgan muhim natijalarga alohida to‘xtaldi. Xususan, 188 ta mahalladagi 715 ming nafar aholi yashaydigan xonadonlarga ilk bor markazlashgan toza ichimlik suvi yetkazilgani, shuningdek, qariyb 2 million 300 ming aholining suv ta’minoti yaxshilangani ta’kidlandi.

 

Shu bilan birga, 867 ta “og‘ir” mahalladagi 470 mingta xonadonga tomorqalarni sug‘orish uchun birinchi marta suv yetib borgani qayd etildi.

 

Joriy yilda aholi uchun 8 million 100 ming kvadrat metr ko‘p qavatli uy-joylar foydalanishga topshirildi. Bundan tashqari, fuqarolar o‘z tashabbusi bilan 19 million kvadrat metr maydonda qurilish ishlarini amalga oshirdi.

 

2025-yilda tadbirkorlik subyektlari tomonidan 24 million kvadrat metr noturar joy obyektlari barpo etildi. Umuman olganda, so‘nggi to‘qqiz yil davomida mamlakatda jami 210 million kvadrat metr turar joy va noturar joy obyektlari foydalanishga topshirilgan.

 

Davlat rahbarining ta’kidlashicha, joriy yilda O‘zbekiston tarixida ilk bor yalpi ichki mahsulot hajmi 145 milliard AQSH dollaridan oshdi.

 

Shuningdek, global savdo tizimida “o‘yin qoidalari” o‘zgarayotgan bir sharoitda mamlakat eksporti 23 foizga oshib, 33,4 milliard dollarga yetgani ma’lum qilindi. O‘zbekistonning oltin-valyuta zaxiralari ilk bor 60 milliard dollardan oshdi.

 

2025-yilda iqtisodiyotga jalb qilingan xorijiy investitsiyalar hajmi 43,1 milliard dollarni tashkil etdi. Jami investitsiyalarning yalpi ichki mahsulotdagi ulushi 31,9 foizga teng bo‘lib, bu kelgusi yillarda iqtisodiyotning barqaror va yuqori sur’atlarda o‘sishi uchun mustahkam zamin yaratadi.