O‘zbekistonda og‘ir ahvoldagi bolalar uchun professional tutingan oila tizimi joriy etiladi
Yangi tizim zo‘ravonlikdan jabrlangan va ijtimoiy xavf ostidagi bolalarni himoyalashga qaratilgan.
2026-yil 1-fevraldan boshlab O‘zbekistonda zo‘ravonlik oqibatida oilasidan ajratilgan hamda ijtimoiy jihatdan xavfli sharoitda qolgan bolalar uchun professional tutingan oila xizmati yo‘lga qo‘yiladi. Bu Prezidentning 2026–2030-yillarga mo‘ljallangan bolalarni zo‘ravonlikdan himoya qilish strategiyasida belgilangan.
Mazkur tizim doirasida tutingan oila bo‘lishni istagan nomzodlar bolalardagi ruhiy jarohatlarni kamaytirish va xulq-atvor muammolarini bartaraf etishga qaratilgan maxsus ijtimoiy-reabilitatsiya dasturlari asosida tayyorlanadi. Bolalar “Inson” markazlari orqali shartnoma asosida ushbu oilalarga joylashtiriladi.
Professional tutingan oilalarga har bir bola uchun oyiga mehnatga haq to‘lashning eng kam miqdorining ikki baravari miqdorida mablag‘ to‘lanadi. Shuningdek, bolalarning yashash xarajatlari davlat tomonidan qoplanadi.
Bundan tashqari, 2026-yildan zo‘ravonlikdan jabrlangan bolalarga bepul yuridik yordam ko‘rsatiladi, ularning dastlabki ko‘rsatmalari majburiy videoqayd etiladi hamda bolalarga nisbatan zo‘ravonlik holatlari haqida xabar bermagan mutaxassislar uchun ma’muriy javobgarlik joriy etiladi.
Alisher NAMOZOV,
Sirdaryo viloyati Fuqarolik ishlari bo‘yicha
Oqoltin tumanlararo sudining raisi
