Qo‘qonlik "tabib ishi" bo‘yicha sud qarori o‘zgarishsiz qoldi
Tabibga 10 sutka ma’muriy qamoq jazosi tayinlangan edi.
Qo‘qon shahrida faoliyat yuritgan tabib I. Saliyevga nisbatan chiqarilgan sud qarori o‘zgarishsiz qoldirildi. Farg‘ona viloyati sudining apellyatsiya instansiyasi 2025-yil 20-dekabr kuni uni 10 sutkaga maʼmuriy qamoqqa olish haqidagi qarorni kuchida qoldirdi.
Maʼlum qilinishicha, himoya tomoni tomonidan berilgan apellyatsiya shikoyati sud hayʼati tomonidan qanoatlantirilmagan.
Sudda qayd etilishicha, O‘zbekiston qonunchiligiga muvofiq xalq tabobati bilan shug‘ullanish uchun belgilangan tartibda litsenziya talab etiladi. I. Saliyevda bunday litsenziya mavjud emas. U taqdim etgan “xalq tabobati aʼzosi” guvohnomasi esa litsenziya o‘rnini bosmaydi.
Shuningdek, ijtimoiy tarmoqlarda tarqalgan videomateriallar uning tomonidan joylanmagani haqidagi vajlar ham asosli deb topilmadi. Sud I. Saliyev mazkur kanal va profillarda faol ishtirok etganini taʼkidladi.
Ayni paytga qadar ushbu qaror bo‘yicha kassatsiya shikoyati berilmagan.
