Toshkent viloyatida 100 dan ortiq sanoat obyektining faoliyati vaqtincha to‘xtatildi

 

So‘nggi bir oy davomida Toshkent shahri va Toshkent viloyatida havo sifatini yaxshilash hamda zararli chiqindilarni kamaytirishga qaratilgan keng ko‘lamli ekologik tekshiruvlar o‘tkazildi. Bu haqda Ekologiya va iqlim o‘zgarishi milliy qo‘mitasi axborot xizmati xabar berdi.

 

Xususan, 25 noyabrdan 24 dekabrgacha bo‘lgan davrda o‘tkazilgan nazorat tadbirlari davomida mutaxassislar tomonidan jami 1 128 ta ekologik qoidabuzarlik holati aniqlanib, ularning har biri bo‘yicha belgilangan tartibda maʼmuriy hujjatlar rasmiylashtirildi.

 

Tekshiruvlar natijasida atrof-muhitga jiddiy salbiy taʼsir ko‘rsatgani aniqlangan 110 ta sanoat obyektining faoliyati vaqtincha to‘xtatildi. Ushbu korxonalarning 99 tasi Toshkent viloyatida, 11 tasi esa Toshkent shahri hududida joylashgan.

 

Qoidabuzarliklarni bartaraf etish uchun ularning faoliyati 10 ish kunigacha to‘xtatilgan.

 

Komissiya tomonidan qishloq xo‘jaligi sohasiga ham alohida eʼtibor qaratildi. Tekshiruvlar yakuniga ko‘ra, 94 ta issiqxona majmuasi chang va gazni tozalash uskunalari bilan jihozlandi. Shu bilan birga, issiqxonalarni ekologik toza yoqilg‘iga o‘tkazish ishlari davom ettirilmoqda.

 

Hozirga qadar 6 ta issiqxona majmuasi gaz tarmog‘iga ulangan, yana 7 tasi gazlashtirish uchun texnik shartlar olish maqsadida ariza topshirgan.

 

Nazorat tadbirlari izchil davom etmoqda. Jumladan, 23 dekabr kuni o‘tkazilgan tekshiruvlar davomida atrof-muhitni muhofaza qilish to‘g‘risidagi qonun hujjatlarining yana 8 ta buzilishi qayd etildi.