2026-yildan yagona Ijtimoiy reestr joriy etiladi
“Mahalla yettiligi”ga kambag‘allik chegarasidagi oilalarni aniqlash vakolati berildi.
O‘zbekistonda ijtimoiy qo‘llab-quvvatlash tizimini tubdan takomillashtirishga qaratilgan muhim hujjat qabul qilindi. Prezidentning “Ijtimoiy himoyaga muhtoj aholi qatlamlariga davlat ijtimoiy qo‘llab-quvvatlash choralarini taqdim etish tizimini tubdan takomillashtirish chora-tadbirlari to‘g‘risida”gi Farmoni imzolandi.
Farmonga muvofiq, 2026-yil 1-fevraldan boshlab amalda mavjud “Ijtimoiy himoya yagona reestri” hamda “Kambag‘al oilalar reestri” negizida yagona Ijtimoiy reestr joriy etiladi.
Yangi reestrga kiritilgan oilalar ularning ijtimoiy-iqtisodiy holatidan kelib chiqib quyidagi toifalarga ajratiladi:
Davlat ta’minotidagi oila — mehnatga layoqatsiz yoki mehnat qilish imkoniyati cheklangan, har bir a’zosiga to‘g‘ri keladigan o‘rtacha oylik daromadi minimal iste’mol xarajatlaridan kam bo‘lgan oilalar;
Kambag‘al oila — mehnatga layoqatli yoki mehnat qilish imkoniyatiga ega bo‘lgan, biroq bir a’zosiga to‘g‘ri keladigan o‘rtacha oylik daromadi minimal iste’mol xarajatlaridan kam bo‘lgan oilalar;
Kambag‘allik chegarasidagi oila — bir a’zosiga to‘g‘ri keladigan o‘rtacha oylik daromadi minimal iste’mol xarajatlarining bir baravaridan bir yarim baravarigacha bo‘lgan oilalar.
Yangi Ijtimoiy reestr davlat tomonidan ko‘rsatiladigan ijtimoiy yordamni manzilli, shaffof va ehtiyojga mos tarzda tashkil etishga xizmat qiladi.
Shuningdek, Farmon bilan “Mahalla yettiligi” vakolatlari kengaytirildi. Endilikda u og‘ir hayotiy vaziyatga tushib qolgan ayrim oilalarni tavsiya asosida “kambag‘allik chegarasidagi oila” toifasiga kiritish huquqiga ega bo‘ladi.
Mazkur toifaga quyidagi oilalar kiritilishi mumkin:
I va/yoki II guruh nogironligi bo‘lgan shaxs yoki bolalikdan nogironligi bo‘lgan shaxs mavjud oilalar;
boquvchisini yo‘qotgan yoki bolasini yolg‘iz tarbiyalayotgan oilalar;
o‘zgalar parvarishiga muhtoj bo‘lgan yolg‘iz yashovchi shaxslar;
oila a’zosi muddatli harbiy xizmatda yoki jazoni ijro etish muassasasida bo‘lgan oilalar;
oila a’zosi psixiatriya, narkologiya, sil kasalliklari dispanserlarida hisobda turgan, shuningdek, onkologiya markazlarida ro‘yxatda bo‘lgan yoki gematologiya, immunologiya, jigar va buyrak yetishmovchiligi kabi og‘ir kasalliklarga chalingan shaxs mavjud oilalar;
yong‘in, baxtsiz hodisa, tabiiy yoki texnogen favqulodda vaziyatlardan jabr ko‘rgan oilalar.
Mazkur mexanizm og‘ir vaziyatga tushib qolgan oilalarni o‘z vaqtida aniqlash hamda ularga davlat tomonidan tezkor va manzilli yordam ko‘rsatishga qaratilgan.
