Ukrainada saylovlar uchun mablag‘ yetarli emas
Saylovlarni o‘tkazish xarajatlari 480 million dollargacha yetishi mumkin.
Ukraina prezidenti idorasi mamlakatda yaqin muddatda saylovlarni o‘tkazish uchun moliyaviy imkoniyatlar mavjud emasligini ma’lum qildi.
Prezident devonining maslahatchisi Mixaylo Podolyakning aytishicha, davlat byudjetida hozircha boshqa ustuvor yo‘nalishlar — mudofaa, safarbarlik va aholini ijtimoiy qo‘llab-quvvatlash xarajatlari birinchi o‘rinda turibdi.
Podolyak Novyny.LIVE nashriga bergan intervyusida Ukrainada byudjet taqchilligi yuqori ekanini, shu sababli saylovlarni moliyalashtirish imkonsizligini ta’kidladi.
Ma’lum qilinishicha, 2026-yilgi davlat byudjeti daromadlari 2,918 trillion grivna, xarajatlari esa 4,781 trillion grivnani tashkil etadi.
Natijada byudjet taqchilligi qariyb 1,863 trillion grivna yoki 47,5 milliard dollarga teng.
Uning so‘zlariga ko‘ra, mavjud moliyaviy resurslar asosan harbiy ehtiyojlar hamda aholining iqtisodiy yo‘qotishlarini qoplashga yo‘naltirilmoqda.
Podolyak bu borada maxsus ishchi guruh tuzish va parlament darajasida xarajatlarni batafsil hisoblash zarurligini bildirdi.
Ukraina Markaziy saylov komissiyasi ma’lumotlariga ko‘ra, 2019-yilgi prezidentlik saylovlari byudjetga qariyb 2 milliard grivnaga tushgan. Amaldagi iqtisodiy sharoit va inflyatsiyani inobatga olgan holda, hozirgi kunda prezidentlik saylovlarining birinchi bosqichi 4–5 milliard grivna, ikkinchi bosqichi esa 6,5–7 milliard grivnani talab qiladi. Agar barcha darajadagi saylovlar o‘tkazilsa, umumiy xarajatlar 20 milliard grivnaga, ya’ni qariyb 480 million dollarga yetishi mumkin.
Eslatib o‘tilishicha, Ukrainada prezidentlik saylovlari 2024-yil mart oyida bo‘lib o‘tishi kerak edi, biroq mamlakatda harbiy holat joriy etilgani sababli noma’lum muddatga qoldirilgan. Prezident Vladimir Zelenskiy saylovlar faqat sulh tuzilgach yoki ishonchli xavfsizlik kafolatlari ta’minlanganidan keyin o‘tkazilishi mumkinligini ta’kidlagan.
