Fuqarolar uyi oldiga avtomobil qo‘ygani uchun pul to'lamaydi — Toshkent shahar hokimligi
Toshkentda “rezidentlik ruxsatnomasi” joriy etilishi yuzasidan rasmiy izoh berildi.
Ijtimoiy tarmoqlarda Toshkent shahar hokimining 2025-yil 25-dekabrdagi 921-14-0-Q/25-sonli qarori yuzasidan turli muhokamalar paydo bo‘ldi. Ayrim foydalanuvchilar ushbu hujjatni noto‘g‘ri talqin qilib, endilikda aholi o‘z uyi oldida avtomobil qo‘ygani uchun haq to‘lashga majbur bo‘ladi, degan fikrlarni ilgari surmoqda.
Toshkent shahar hokimligi mazkur da’volar asossiz ekanini ma’lum qildi. Rasmiy izohga ko‘ra, yangi joriy etilayotgan tartib faqat yo‘l bo‘yida tashkil etilgan pulli avtoturargohlar faoliyatiga taalluqli. Ko‘p qavatli uylar oralig‘i, hovlilar hamda to‘xtab turish taqiqlanmagan bepul hududlarda avtomobil saqlash uchun hech qanday to‘lov yoki maxsus ruxsatnoma talab etilmaydi.
Qarorga muvofiq, pulli avtoturargoh joylashgan ko‘chalar yoki ularga yaqin hududlarda yashovchi fuqarolar uchun “rezidentlik ruxsatnomasi” joriy etiladi. Ushbu mexanizm uyi oldida pulli to‘xtash joyi tashkil etilgan aholiga imtiyoz berish va ularning avtomobil qo‘yish bilan bog‘liq muammolarini kamaytirishga qaratilgan.
Rezidentlar soat 20:00 dan 08:00 gacha bo‘lgan vaqtda pulli avtoturargohlardan bepul foydalanishi mumkin bo‘ladi. Kunduzgi vaqtda esa soatbay emas, balki yiliga bir marta to‘lanadigan qat’iy to‘lov belgilanadi. Yillik to‘lov miqdori bazaviy hisoblash miqdorining bir baravariga teng bo‘lib, bir xonadon manziliga ko‘pi bilan ikki dona rezidentlik ruxsatnomasi beriladi. Ushbu yangi tartib 2026-yil 1-fevraldan kuchga kiradi.
