Suriyadagi shialar masjidida yuz bergan portlashdan so‘ng, mamlakatdagi alaviylar norozilik namoyishlariga chiqdi
Latakiya va Tartus shaharlarida norozilik bildiruvchilar bilan qarshi namoyishchilar o‘rtasida to‘qnashuvlar yuz bergan.
Suriyada shialarga mansub Imom Ali ibn Abu Tolib masjidida sodir bo‘lgan portlashdan so‘ng mamlakatning qirg‘oqbo‘yi hududlarida yashovchi alaviylar ommaviy norozilik namoyishlarini o‘tkazdi. OAV xabarlariga ko‘ra, namoyishlar Latakiya, Jabla, Baniyas, Tartus va Kardaha shaharlarida bo‘lib o‘tgan.
Norozilik aksiyalarida ishtirok etgan minglab odamlar alaviylarga nisbatan xavfsizlik kafolatlarini kuchaytirish, shuningdek, o‘zini o‘zi boshqarish vakolatlarini kengaytirishni talab qilgan. Namoyishlar Homs shahridagi masjidda juma namozi vaqtida sodir bo‘lgan portlashdan ikki kun o‘tib boshlangan.
Latakiya va Tartus shaharlarida norozilik bildiruvchilar bilan qarshi namoyishchilar o‘rtasida to‘qnashuvlar yuz bergan. Mahalliy sog‘liqni saqlash idoralariga ko‘ra, voqealar oqibatida kamida uch kishi halok bo‘lgan, 60 ga yaqin inson jarohat olgan. Qurbonlar orasida xavfsizlik kuchlari xodimi ham bor.
Rasmiylarga ko‘ra, tartibni tiklash maqsadida xavfsizlik kuchlari hududga jalb etilgan, ayrim joylarda maydonlar yopilgan. Hukumat vakillari Homsdagi portlashni qoralab, aybdorlar javobgarlikka tortilishini bildirgan, biroq hozircha gumonlanuvchilar haqida rasmiy ma’lumot berilmagan.
