Toshkentda bir oyda 49 kgdan ortiq giyohvand moddalar tarqalishining oldi olindi
Poytaxtda giyohvandlik vositalari va kuchli ta’sir qiluvchi moddalar bilan bog‘liq jami 592 ta holat aniqlanib, 256 ta jinoyat ishi qo‘zg‘atildi.
Toshkent shahrida bir oy davomida giyohvandlik va kuchli ta’sir qiluvchi moddalar noqonuniy aylanishiga qarshi olib borilgan tezkor-profilaktik tadbirlar natijasida yirik hajmdagi moddalar tarqalishining oldi olindi.
Ichki ishlar vazirligi tomonidan 20-noyabrdan 20-dekabrgacha respublika bo‘ylab “Xavfsiz va sog‘lom mamlakat” keng ko‘lamli tezkor-profilaktik tadbirlarining uchinchi bosqichi o‘tkazildi. Bu haqda Toshkent shahar IIBB matbuot xizmati xabar berdi.
Mazkur tadbirlar doirasida poytaxtda giyohvandlik vositalari va kuchli ta’sir qiluvchi moddalar bilan bog‘liq jami 592 ta holat aniqlanib, 256 ta jinoyat ishi qo‘zg‘atildi. Noqonuniy muomaladan 49 kilogrammdan ortiq giyohvand moddalar hamda 72 818 dona kuchli ta’sir qiluvchi dori vositalari musodara qilindi.
Shuningdek, 41 nafar “zakladchik” aniqlanib, ulardan jami 2 kilogramm 710 gramm giyohvand modda olib qo‘yildi. 285 ta narkografiti aniqlanib, bartaraf etildi. Ularni chizgan 38 nafar shaxsga nisbatan ma’muriy choralar ko‘rildi.
Mirobod tumanida o‘tkazilgan tezkor tadbirlar davomida ikki nafar shaxs qo‘lga olindi. Ularning Telegram-bot orqali giyohvand moddalar savdosi bilan shug‘ullangani hamda narkolaboratoriya tashkil etgani aniqlandi. Ulardan umumiy qiymati 2 milliard 923 million 200 ming so‘mga teng, 12 600 dozani tashkil etuvchi giyohvand va kuchli ta’sir qiluvchi moddalar musodara qilindi.
Mirzo Ulug‘bek tumanida aniqlangan holatda esa bir fuqaroning uyidan 15 kilogramm marixuana va 300 dona mak ko‘chatlari topildi. Tezkor-qidiruv tadbirlari natijasida umumiy qiymati 3 milliard 750 million so‘mga teng bo‘lgan 7 500 doza giyohvand moddalarning tarqalishiga chek qo‘yildi.
Yangi Hayot tumanida esa o‘zaro bog‘liq bo‘lgan besh nafar shaxs qo‘lga olinib, “pregabalin” nomli kuchli ta’sir qiluvchi dori vositasining noqonuniy tarqatilishi to‘xtatildi. Ushbu moddalar 13 607 nafar fuqaroning zaharlanishiga sabab bo‘lishi mumkin edi.
Mazkur holatlar yuzasidan jinoyat ishlari qo‘zg‘atilib, hozirda tergov harakatlari olib borilmoqda. Ushbu yo‘nalishdagi profilaktik va tezkor tadbirlar davom ettirilmoqda.
