Kitobda kelin MIB orqali 57 turdagi sepini qaytarib oldi
Maʼlum bo‘lishicha, uning shaxsiy mol-mulki javobgar tomonidan noqonuniy ushlab turilgan.
Fuqarolik ishlari bo‘yicha Shaxrisabz tumanlararo sudining 2025 yil 12 sentyabrdagi ajrimiga asosan fuqaro G.A.ning daʼvosi qanoatlantirilib, javobgar M.B. tomonidan noqonuniy ushlab turilgan shaxsiy mol-mulklarni daʼvogarga qaytarib berish belgilangan.
Mazkur ijro hujjati Majburiy ijro byurosining Kitob tuman bo‘limi ish yurituviga qabul qilinib, davlat ijrochilari tomonidan qonun doirasida tezkor va qatʼiy ijro harakatlari tashkil etildi.
Sud ajrimiga muvofiq, javobgarning yashash manzili – Kitob tumanida joylashgan xonadonda ijro harakatlari o‘tkazildi. Ijro jarayonida daʼvogarga tegishli bo‘lgan mikrovolnovka, muzlatgich, kir yuvish mashinasi, televizor, gaz plitasi, idish-tovoqlar, gilamlar, mebel jihozlari, zargarlik buyumlari va boshqa jami 57 turdagi mol-mulklar xatlanib, belgilangan tartibda undiruvchiga qaytarib berildi.
Tegishli tashkilotlar hamkorligida amalga oshirilgan tadbirlar natijasida nizoli holat tinch yo‘l bilan hal etildi.
