Sirdaryoda mashina kanalga tushib ketdi: to‘rt yo‘lovchi halok bo‘ldi
Faqat haydovchi omon qolgan.
Sirdaryo viloyatida sodir bo‘lgan yo‘l-transport hodisasi oqibatida to‘rt nafar yo‘lovchi halok bo‘ldi, faqat haydovchi omon qoldi.
Millar dasturida xabar berilishicha, joriy yilning 26-dekabr kuni taxminan soat 21:30 da 2001-yilda tug‘ilgan haydovchi stadiondan to‘rt nafar tanishini olib, ularning yashash manzili tomon yo‘lga chiqqan. Harakat davomida haydovchi boshqaruvni yo‘qotgan va avtomobil yo‘lovchilari bilan birga kanalga tushib ketgan.
Haydovchi cho‘kayotgan avtomobildan chiqishga muvaffaq bo‘lgan va shifoxonaga yotqizilgan.
Avtomobilda bo‘lgan 19–20 yoshli to‘rt nafar yo‘lovchi esa suvga cho‘kib halok bo‘lgan. Ularning barchasi bir mahallada yashagani qayd etildi.
Mazkur holat yuzasidan Jinoyat kodeksining 266-moddasi 3-qismi “a” bandi — odamlar o‘limiga sabab bo‘lgan transport vositalari harakati yoki ulardan foydalanish xavfsizligi qoidalarini buzish bilan jinoyat ishi qo‘zg‘atilgan. Hozirda tergov harakatlari olib borilmoqda.
