Vens Ilon Maskni yangi partiya tuzishdan qaytardi — The Washington Post
Vens bu tashabbus respublikachilarga zarar yetkazishini taʼkidlagan.
AQSH vitse-prezidenti J.D. Vens amerikalik milliarder Ilon Maskni Qo‘shma Shtatlarda yangi siyosiy partiya tuzish rejasidan voz kechishga ko‘ndirdi. Bu haqda The Washington Post nashri xabar bermoqda.
Nashr maʼlumotlariga ko‘ra, Ilon Mask mazkur tashabbusga jiddiy yondashgan. Biroq vitse-prezident Vens va uning yaqin doirasi yangi partiyaning tashkil etilishi 2026 yilda bo‘lib o‘tadigan oraliq saylovlarda hamda keyingi siyosiy jarayonlarda respublikachilar partiyasiga sezilarli zarar yetkazishi mumkinligidan xavotir bildirgan.
Shu munosabat bilan J.D. Vens Maskning ittifoqchilarini tadbirkorni partiya tuzish g‘oyasidan voz kechishga undashga chaqirgan. WPʼning yozishicha, bir necha oy davom etgan siyosiy va norasmiy muloqotlar o‘z samarasini bergan.
Keyinchalik J.D. Vens Maskning yaqin ittifoqchisi Jared Isaakning nomzodini qo‘llab-quvvatlash uchun hukumatga norasmiy shaklda taʼsir o‘tkazgan. Isaakman Maskka tegishli SpaceX kompaniyasining asosiy moliyaviy hamkorlaridan biri bo‘lib, u dekabr oyida AQSH Milliy aeronavtika va kosmik tadqiqotlar boshqarmasi — NASA rahbari lavozimini egallagan.
Xabar qilinishicha, partiya tuzish g‘oyasidan voz kechgan Ilon Mask noyabr oyida Oq uyda Saudiya Arabistoni valiahd shahzodasi Muhammad bin Salmon sharafiga uyushtirilgan rasmiy kechki ovqatda ishtirok etgan. Shuningdek, konservativ siyosatchi Charli Kirkning o‘ldirilishi fonida Mask 2026 yilgi oraliq saylovlar arafasida Respublikachilar partiyasining saylov kampaniyasini qo‘llab-quvvatlashga qaror qilgan.
