CNN Yangi yil efirida Islom sivilizatsiyasi markazini namoyish etdi
Xalqaro telekanal yarim soatlik hujjatli film orqali O‘zbekistonni islom olamining muhim tarixiy markazi sifatida tanishtirdi
Xalqaro CNN telekanali Yangi yil dasturlari doirasida O‘zbekistondagi Islom sivilizatsiyasi markaziga bag‘ishlangan yarim soatlik hujjatli filmni tomoshabinlarga taqdim etdi. Filmda noyob tarixiy eksponatlar va bebaho madaniy meros namunalari orqali O‘zbekistonning islom sivilizatsiyasidagi o‘rni va ahamiyati yoritilgan.
Ta’kidlash joizki, mazkur loyiha CNN tashabbusi bilan, telekanalning mualliflik hujjatli filmi sifatida yaratilgan. Yangi yil efirlari davomida film besh marotaba namoyish etildi. Bu holat Islom sivilizatsiyasi markazi va O‘zbekistonning boy madaniy merosiga xalqaro auditoriya tomonidan katta qiziqish bildirayotganidan dalolat beradi.
Film namoyishidan avval eksklyuziv videorolik e’lon qilinib, unda markazning O‘zbekiston Prezidenti Shavkat Mirziyoyev tashabbusi bilan yaratilgan konsepsiyasi yoritildi. Videomaterialda xalqaro siyosatchilar va jamoat arboblari ushbu markazni ma’rifat, muloqot va bag‘rikenglik g‘oyalariga asoslangan zamonaviy madaniy maskan sifatida yuqori baholadi.
10 gektar maydonda barpo etilgan Islom sivilizatsiyasi markazi besh galereyani o‘zida jamlagan bo‘lib, unda Usmon mushafi, Muqaddas Ka’ba kalitlari, Amir Temur xazinasidagi Qur’on sahifalari kabi dunyo miqyosidagi noyob artefaktlar namoyish etiladi. Markaz Mavorounnahr allomalarining jahon ilm-fani va madaniyatiga qo‘shgan ulkan hissasini keng jamoatchilikka ochib beruvchi muhim madaniy maskan sifatida e’tirof etilmoqda.
