2026-yildan taksi haydovchilari soliqlarni qanday to‘laydi?
Taksi haydovchilari uchun 1 foizlik soliq stavkasi joriy etiladi.
2026-yil 1-yanvardan boshlab O‘zbekistonda o‘zini o‘zi band qilgan taksi haydovchilari uchun soliq tizimi soddalashtiriladi. Ular uchun aylanmadan olinadigan soliqning kamaytirilgan — 1 foizlik stavkasi joriy etiladi.
Yangi tartibga ko‘ra, soliq faqat haydovchining real daromadi asosida hisoblanadi. Masalan, agar taksi haydovchisi bir oyda 2 million so‘m daromad qilsa, to‘lanadigan soliq miqdori atigi 20 ming so‘mni tashkil etadi.
Agar yo‘lovchilar onlayn taksi agregatorlari orqali tashilgan bo‘lsa, soliq avtomatik tarzda undiriladi. Bunda agregator platforma haydovchining daromadidan 1 foizni ushlab qolib, uni to‘g‘ridan to‘g‘ri davlat byudjetiga o‘tkazadi. Ushbu mexanizm faqat agregator orqali olingan daromadlarga tatbiq etiladi. Platformadan tashqarida amalga oshirilgan tashuvlardan olingan mablag‘lar avtomatik soliq hisobiga kiritilmaydi.
Shuningdek, elektron to‘lovlarni qabul qilish uchun QR-kod o‘rnatish masalasiga ham aniqlik kiritildi. Amaldagi tartibga ko‘ra, 2026-yildan boshlab yakka tartibdagi tadbirkorlar va o‘zini o‘zi band qilgan shaxslar uchun QR-koddan foydalanish majburiy etib belgilangan. Biroq taksi haydovchilari uchun bu talab istisno tariqasida qo‘llanilmaydi.
Xususan, 2025-yil 12-avgustdagi 247-sonli qarorga muvofiq, soliq organlarining axborot tizimlari bilan integratsiyalashgan onlayn agregatorlar orqali yo‘lovchi tashish va yetkazib berish xizmatlarini ko‘rsatuvchi haydovchilar va kuryerlardan alohida QR-kod o‘rnatish talab etilmaydi.
