Rossiyada 2027-yilgacha migrantlarni kuzatish bo‘yicha yangi tizim joriy etiladi
2026-yilda chet elliklar uchun biometrik identifikatsiya tizimi ishga tushiriladi.
Rossiya hukumati 2027-yil oxiriga qadar mamlakat hududida migrantlar harakati ustidan nazoratni kuchaytirishga qaratilgan kompleks choralarni amalga oshiradi. Bu haqda TASS tomonidan ko‘rib chiqilgan Rossiya Federatsiyasining migratsiya siyosati bo‘yicha rejasida ma’lum qilindi.
Hujjatga ko‘ra, xorijiy fuqarolarning Rossiya hududi bo‘ylab harakatini monitoring qilishga mo‘ljallangan maxsus axborot tizimi 2027-yil 10-dekabrga qadar ishga tushiriladi.
Mazkur loyiha Ichki ishlar vazirligi, Federal xavfsizlik xizmati, Transport vazirligi va Raqamli rivojlanish vazirligi tomonidan Rossiya hududlari bilan hamkorlikda amalga oshiriladi.
Shu bilan birga, 2026-yil dekabriga qadar chet elliklarni biometrik identifikatsiyalash uchun alohida axborot tizimini yaratish rejalashtirilgan. Ushbu tizim xorijiy fuqarolarning shaxsini aniqlash va migratsiya jarayonlarini nazorat qilish samaradorligini oshirishga xizmat qiladi.
Rejaga muvofiq, Rossiya Ichki ishlar vazirligi xalqaro aviachiptalarni bron qilish tizimlaridan foydalanish imkoniyatiga ega bo‘ladi. Bu choralar Rossiyaga kirishi taqiqlangan xorijiy fuqarolar haqida avvaldan axborot olish va chegaradagi nazoratni kuchaytirish maqsadida joriy etiladi.
Bundan tashqari, vazirlik tomonidan ochiq manbalardagi ma’lumotlarni tahlil qilishga mo‘ljallangan maxsus axborot tizimini yaratish ham ko‘zda tutilgan.
