Endi OTMlar talabalarga moddiy yordam ko‘rsatishi mumkin bo‘ladi
To‘lov-kontrakt to‘lash muddatlari bosqichma-bosqich belgilanib, talabalar uchun ijtimoiy qo‘llab-quvvatlash imkoniyatlari kengaytirildi.
Adliya vazirligi “Ta’lim tashkilotlarida to‘lov-kontrakt shakli va undan tushgan mablag‘larni taqsimlash tartibi to‘g‘risida”gi nizomga kiritilgan o‘zgartirishlarni davlat ro‘yxatidan o‘tkazdi (ro‘yxat raqami: 2431-5, 21.11.2025). Mazkur hujjat oliy ta’lim tashkilotlarida kontrakt asosida o‘qish uchun to‘lovlarni amalga oshirish tartibini yanada aniq belgilab berdi.
Yangi tartibga ko‘ra, kontrakt summasining kamida 25 foizi abituriyentlar uchun 15 sentyabrgacha, yuqori bosqich talabalari uchun esa 1 oktyabrgacha to‘lanadi. Shuningdek, to‘lovning kamida 50 foizi 1 yanvargacha, 75 foizi 1 martgacha va 100 foizi 1 maygacha amalga oshirilishi lozim. Mazkur muddatlar oliy ta’lim tashkiloti rektori yoki Davlat komissiyasi qaroriga ko‘ra uzaytirilishi mumkin.
Bundan tashqari, yangi o‘zgartirishlarga muvofiq, OTMlar talabalarning ijtimoiy himoyasini kuchaytirish maqsadida ularga moddiy yordam ko‘rsatish huquqiga ega bo‘ladi. Endilikda oliy ta’lim muassasalari bir talaba uchun yiliga mehnatga haq to‘lashning eng kam miqdorining 6 barobarigacha moddiy yordam ajratishi mumkin. Bu yangilik talabalarning moliyaviy yukini yengillashtirishga xizmat qilishi kutilmoqda.
