Venesuela AQSh hujumlari sabab BMT Xavfsizlik Kengashining favqulodda yig‘ilishini talab qildi
Karakas AQShni xalqaro huquqni buzishda ayblab, vaziyatni BMT darajasida ko‘rib chiqishga chaqirmoqda.
Venesuela AQSh tomonidan amalga oshirilgan hujumlar ortidan Birlashgan Millatlar Tashkiloti Xavfsizlik Kengashining favqulodda yig‘ilishini chaqirishni so‘radi. Bu haqda mamlakat tashqi ishlar vaziri Ivan Gil ma’lum qildi. Uning aytishicha, Karakas Vashingtonning harakatlarini “jinoyatkorona tajovuz” sifatida baholamoqda. Bu haqda A news xabar bermoqda.
Vazir Gil Telegram orqali bergan bayonotida BMT Xavfsizlik Kengashi xalqaro huquqni himoya qilish uchun mas’ul asosiy organ ekanini ta’kidladi. “Hech qanday qo‘rqoqona hujum xalqimiz irodasini sindira olmaydi. Venesuela xalqi bu sinovdan ham g‘olib bo‘lib chiqadi”, — dedi u. Rasmiylarga ko‘ra, AQSh hujumlari bir necha hududlarda fuqarolik va harbiy obyektlarga zarar yetkazgan, mamlakatda favqulodda holat e’lon qilingan.
AQSh prezidenti Donald Tramp esa Truth Social platformasida Venesuelaga qarshi “keng ko‘lamli zarbalar” berilganini tasdiqladi. U, shuningdek, Venesuela prezidenti Nikolas Maduro va uning rafiqasi qo‘lga olinib, mamlakatdan olib chiqib ketilganini da’vo qildi. Mazkur bayonot xalqaro maydonda keskin munosabatlarga sabab bo‘lib, vaziyatning yanada keskinlashishidan xavotirlar kuchaymoqda.
