2026-yilda 1 million fuqaro doimiy ish bilan ta’minlanadi
O‘zbekistonda ishsizlik va kambag‘allik darajasi 4,5 foizga tushiriladi.
O‘zbekistonda 2026-yilda ishsizlik va kambag‘allik darajasini 4,5 foizgacha pasaytirish rejalashtirilmoqda. Bu haqda Oliy Majlis Qonunchilik palatasi yig‘ilishida Bandlik va mehnat munosabatlari vaziri Botir Zohidov ma’lum qildi.
Vazirning aytishicha, hozirda mamlakatdagi ishsizlik darajasi 5,8 foizni tashkil etib, so‘nggi yillarda ushbu ko‘rsatkich sezilarli darajada qisqargan. Kelgusida esa asosiy e’tibor mehnat bozoriga yangi kirib kelayotgan aholining bandligini ta’minlashga qaratiladi.
Shu maqsadda 2026-yil davomida 1 million nafar fuqaro doimiy ish joylari bilan ta’minlanishi rejalashtirilgan. Bundan tashqari, 4 million nafar aholining daromadini oshirish, jumladan, 1 million nafar kambag‘al aholini daromadni ko‘paytirishga qaratilgan xizmatlar bilan qamrab olish ko‘zda tutilmoqda.
Bandlik sohasidagi muhim yo‘nalishlardan biri sifatida norasmiy mehnatni qisqartirish belgilanib, 2026-yilda 1 million nafar norasmiy ishlayotgan fuqaroning faoliyatini rasmiy sektorga o‘tkazish rejalashtirilmoqda. Bu mehnat bozori shaffofligini oshirish va ijtimoiy himoyani kuchaytirishga xizmat qilishi kutilmoqda.
Mazkur maqsadlarni amalga oshirish doirasida qator loyihalar rejalashtirilgan. Xususan, “Bandlik organlari — ish beruvchilar hamkori” loyihasi orqali 30 mingdan ortiq ish beruvchi bilan hamkorlik yo‘lga qo‘yilib, 150 ming nafar fuqaro ish bilan ta’minlanadi.
“Mehnatsevar ayol” loyihasi doirasida 40 mingdan ortiq imkoniyati cheklangan fuqaroni bandlikka jalb etish rejalashtirilgan.
Shuningdek, “Mahalliy brendlar tarmog‘i”ni hududlarda kengaytirish orqali kamida 30 ming nafar aholi ish bilan ta’minlanadi.
Qishloq xo‘jaligi sohasida o‘quv-tajriba maydonlarini tashkil etish va yuqori daromadli ekinlarni joriy etish orqali 250 ming nafar aholining daromadini ikki barobarga oshirish maqsad qilingan.
Ma’lumotlarga ko‘ra, 2025-yilning yanvar–noyabr oylarida qariyb 5,1 million nafar fuqaro daromadli mehnatga jalb etilgan, shu davrda 450 mingdan ortiq norasmiy ishlayotgan shaxslarning faoliyati rasmiylashtirilgan.
