Eronda norozilik namoyishlari tufayli internetga kirish taqiqlandi
Eron hukumati avval ham 2009, 2019 va 2022-yillardagi noroziliklar paytida internetga kirishni cheklagan.
Eron hukumati mamlakat bo‘ylab davom etayotgan hukumatga qarshi norozilik namoyishlari sababli internetga kirishni vaqtincha chekladi. Bu haqda IT infratuzilmasini monitoring qiluvchi Cloudflare kompaniyasi ma’lumot berdi.
Qayd etilishicha, 3-yanvar kuni Eronda internet trafik hajmi qisqa vaqt ichida qariyb uchdan bir qismga kamaygan. 4-yanvar tongida esa internet faolligi odatiy ko‘rsatkichdan deyarli 15 foizga past bo‘lgan. Ijtimoiy tarmoqlarda ko‘plab foydalanuvchilar keng ko‘lamli uzilishlar kuzatilganini bildirgan.
Eslatib o‘tilishicha, Eron hukumati avval ham 2009, 2019 va 2022-yillardagi noroziliklar chog‘ida, shuningdek, 2025-yil iyun oyida Isroil hujumlari paytida internetga kirishni cheklagan. Ayrim hollarda faqat cheklangan sonli rasmiy saytlar ishlagan.
Norozilik namoyishlari chog‘ida qurbonlar borligi haqida ham xabarlar kelmoqda. Hengaw Inson huquqlari tashkiloti ma’lumotiga ko‘ra, 3-yanvar kuni Eron g‘arbidagi Ilam viloyatining Malekshahi tumanida Islom inqilobi qo‘riqchilari korpusi (IRGC) tomonidan namoyishchilarga qarata o‘t ochilgan. Natijada kamida to‘rt kishi halok bo‘lgan, o‘nlab fuqarolar jarohat olgan.
Norvegiyada joylashgan Iran Human Rights (IHR) tashkiloti ham kamida to‘rt nafar fuqaro halok bo‘lgani va 30 kishi yaralangani haqida ma’lum qildi. Shu bilan birga, Eronning Mehr axborot agentligi to‘qnashuvlar vaqtida IRGCning bir nafar xodimi halok bo‘lganini xabar qildi.
Norozilik namoyishlari 2025-yil 28-dekabrda boshlangan. Dastlab Tehron va boshqa shaharlarda tadbirkorlar iqtisodiy vaziyatning yomonlashuvi, yuqori inflyatsiya va G‘arb sanksiyalariga qarshi norozilik sifatida do‘konlarini yopishgan. Keyinchalik namoyishlar siyosiy tus olib, ayrim hududlarda to‘qnashuvlarga aylangan.
Ma’lumotlarga ko‘ra, Eron iqtisodiyoti hozirda 40 foizdan ortiq inflyatsiya va xalqaro sanksiyalar bosimi ostida qolmoqda.
AQSh prezidenti Donald Tramp 2-yanvar kuni Eron hukumati tinch namoyishchilarga nisbatan zo‘ravonlik qo‘llasa, Qo‘shma Shtatlar aralashishi mumkinligi haqida ogohlantirgan.
